Durrës, lokal i fshehtë me tavolina pokeri dhe 15 telefona — një i arrestuar

Pas një lokali të zakonshëm në lagjen nr. 14 të Durrësit fshihej, sipas policisë, një pikë lojërash fati e paligjshme, me tavolina pokeri dhe telefona celularë të kthyer në aparate loje. Zbulimi i saj ka çuar në një arrestim dhe në procedimin penal të pronarit.

Operacioni, i koduar "Fati i lojërave", u finalizua nga specialistët e Seksionit për Hetimin e Krimeve të Komisariatit Durrës. Sipas policisë, bazuar edhe në informacione të siguruara në rrugë operative, u ushtruan kontrolle në disa lokale dhe ambiente që dyshohej se përdoreshin për organizimin e lojërave të fatit.

Gjatë kontrollit në lokalin e lagjes nr. 14, uniformat blu thanë se konstatuan tavolina pokeri dhe faqe të ngjashme me ato të basteve sportive në telefonat celularë. Në cilësinë e provës materiale u sekuestruan tavolina pokeri, çipsa dhe 15 aparate celularë.

Në flagrancë u arrestua shtetasi F. T., 35 vjeç, banues në Durrës, i cili sipas policisë kishte marrë me qira lokalin, pa kontratë, për të zhvilluar veprimtarinë e paligjshme. I procesuar penalisht mbetet edhe M. M., 24 vjeç, pronari i lokalit, për veprën penale "Vënia në dispozicion e lokalit për zhvillim të paligjshëm të lojërave të fatit" — sipas policisë, ai ia kishte dhënë ambientin qiramarrësit pa kontratë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.