Durrës: kapet në flagrancë me pistoletë në çantë një 30-vjeçar, procedohet edhe një 28-vjeçare

Çanta marsup e tradhtoi. Në momentin kur hyri në një apartament të marrë me qira në lagjen nr. 11 të Durrësit, 30-vjeçari u ndalua nga policia dhe, gjatë kontrollit, në brendësi të çantës i është gjetur një armë zjarri tip pistoletë me municion luftarak. Arma u sekuestrua si provë materiale.

Sipas Policisë së Shtetit, arrestimi është finalizimi i operacionit policor të koduar "Informacioni", të organizuar nga specialistët e Seksionit për Hetimin e Krimeve në Drejtorinë Vendore të Policisë Durrës, pasi kishin marrë informacione se një 30-vjeçar mbante armë zjarri dhe qarkullonte i armatosur.

I arrestuari në flagrancë është shtetasi me inicialet H. K., 30 vjeç, banues në Durrës. Ndaj tij, policia ka regjistruar veprën penale "Prodhimi, mbajtja apo shitja pa leje e armëve dhe municionit luftarak".

Në apartament, bashkë me të, ndodhej edhe shtetasja me inicialet K. Sh., 28-vjeçe, banuese në Tiranë. Ajo është proceduar penalisht në gjendje të lirë për veprën penale "Moskallëzimi i krimit".

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme. Për të dy personat vlen prezumimi i pafajësisë deri në një vendim përfundimtar të gjykatës.