Dronët rusë godasin kalimin kufitar me Poloninë, evakuohet treni me këshilltarin e Merzit

Kamionë në flakë në njërën nga arteriet kryesore tregtare të Ukrainës: një sulm rus me dronë goditi pikën kufitare Jahodin-Dorohusk, në kufirin mes Ukrainës dhe Polonisë, njoftoi të dielën ministri i Jashtëm ukrainas, Andrii Sybiha. Pamje të publikuara në rrjetet sociale tregojnë automjete të mëdha transporti të përfshira nga zjarri, ndërsa mediat ukrainase raportuan se u godit një pikë karburanti. Të dhëna për viktima të mundshme nuk kishte deri tani. Sulmin e konfirmoi në platformën X edhe ushtria polake.

Jahodin-Dorohusk është një nga pikat kufitare më të rëndësishme për Ukrainën. Aty kalojnë çdo ditë mijëra kamionë kufirin e jashtëm të Bashkimit Evropian, duke sjellë mallra brenda vendit dhe duke nxjerrë eksportet ukrainase drejt Perëndimit.

Reagimi i Kievit ishte i ashpër. "Sulmet barbare të Rusisë ndaj pikës kufitare ukrainaso-polake në Jahodin nuk janë thjesht një vazhdim i sulmeve të saj ndaj kufijve tanë shtetërorë", shkroi Sybiha, duke e cilësuar goditjen si "terrori i Putinit, që po troket drejtpërdrejt në dyert e BE-së dhe të NATO-s. Barbarët rusë janë para portës suaj, të dashur partnerë".

Goditja nuk ishte e izoluar. Që nga vera, Moska ka sulmuar në mënyrë të përsëritur dhe të synuar pikat kufitare ukrainase drejt Perëndimit, të cilat ndodhen larg vijës së frontit, por konsiderohen jetike për mbijetesën ekonomike të vendit. Vetëm gjatë javëve të fundit janë sulmuar disa kalime kufitare drejt Moldavisë dhe Rumanisë. Qëllimi është ndërprerja e rrugëve logjistike që e lidhin Kievin me Perëndimin. Sulmet e qëllimshme ndaj infrastrukturës civile konsiderohen krim lufte sipas së drejtës ndërkombëtare.

Rusia i përdor prej kohësh këto goditje si strategji, fillimisht kundër centraleve elektrike ukrainase e tashmë edhe kundër magazinave të mallrave. Nga ana tjetër, Ukraina ka nisur këtë vit të shkatërrojë në mënyrë të synuar magazinat e tregtarit rus onlajn "Wildberries".

Sulmi i së dielës preku edhe një zyrtar të lartë gjerman. Günter Sautter, këshilltar për politikën e jashtme dhe të sigurisë në Kancelari dhe një nga bashkëpunëtorët më të afërt të kancelarit Friedrich Merz, udhëtonte natën e së shtunës në të diel me një tren nate nga Kievi drejt Polonisë. Rreth orës pesë të mëngjesit, treni i marrë me qira privatisht u ndal jo shumë larg kufirit polak dhe një pjesë e vagonëve u evakuua për shkak të rënies së dronëve në zonën kufitare.

Sautter kishte qenë në kryeqytetin ukrainas për bisedime mbi negociatat e mundshme të paqes me Rusinë, së bashku me këshilltarët e sigurisë nga Britania e Madhe, Franca dhe Italia dhe me qeverinë e presidentit Volodimir Zelenski. Të shtunën ai kishte marrë pjesë në konferencën ndërkombëtare të sigurisë "YES", e zhvilluar në bunkerin e një hoteli luksoz. Me të njëjtin tren special po kthehej drejt Polonisë edhe ish-kryeministri britanik Boris Johnson, ndërsa në bord ndodheshin këshilltarë sigurie të qeverive të tjera evropiane, deputetë të Bundestagut, diplomatë dhe studiues.