Dronë dhe kamera kurth kundër gjuetarëve të paligjshëm në Bjeshkët e Nemuna dhe Sharr

Dronë në ajër, kamera kurth në pyje dhe patrulla në terren: kjo është përgjigjja që institucionet e Kosovës paralajmërojnë për këdo që tenton të gjuajë në Parqet Kombëtare "Bjeshkët e Nemuna" dhe "Sharri", tani që hapet sezoni i gjuetisë.

Ministrja e Mjedisit dhe Planifikimit Hapësinor, Fitore Pacolli, ka rikujtuar përmes një postimi se gjuetia në territorin e këtyre dy parqeve është e ndaluar me ligj. Ajo ka bërë të ditur se monitorimi dhe kontrollet do të shtohen, me qëllim parandalimin e gjuetisë së kundërligjshme.

Sipas ministres, mbikëqyrja do të kryhet nga rojet e parqeve, me dronë, kamera kurth dhe patrullime në terren, në bashkëpunim me Policinë e Kosovës dhe organet e tjera kompetente.

Pacolli e ka cilësuar mbrojtjen e biodiversitetit dhe të kafshëve të egra si përgjegjësi të përbashkët, duke bërë thirrje për respektimin e ligjit dhe ruajtjen e pasurisë natyrore të vendit.