Dosja "Revanshi": GJKKO shpall vendimin për shtatë të pandehurit, prokuroria kërkoi mbi 98 vjet burg

Shtatë emra, 12 ngjarje kriminale dhe një kërkesë dënimi që kalonte 98 vjet burg: Gjykata e Posaçme kundër Korrupsionit dhe Krimit të Organizuar (GJKKO) ka shpallur vendimin për të pandehurit e dosjes së njohur si "Revanshi".

Vendimi u dha për Durim Bamin, Altin Morinën, Aldo Avdylin, Jozi Krajën, Edison Jozvikun, Heneringert Mitrin dhe Oltion Zefin.

Hetimi i Prokurorisë së Posaçme kundër Korrupsionit dhe Krimit të Organizuar zbardhi 12 ngjarje kriminale që ndodhën, u përgatitën ose dështuan gjatë vitit 2020, të lidhura me shtatë grupe kriminale me veprimtari në Lezhë, Durrës, Krujë, Tiranë, Vlorë dhe Burrel.

Për këtë grup, prokuroria kishte kërkuar dënime që në total kalonin 98 vjet burg. Kërkesat ishin: për Durim Bamin 21 vjet burg, 14 vjet me gjykim të shkurtuar; për Oltion Zefin 20 vjet burg, 13 vjet e 4 muaj me gjykim të shkurtuar; për Edson Jozvikun 15 vjet burg, 10 vjet me gjykim të shkurtuar; për Altin Morinën 13 vjet e 6 muaj burg, 9 vjet me gjykim të shkurtuar; për Aldo Avdylin dhe Jozi Krajën nga 10 vjet burg, përkatësisht 6 vjet e 8 muaj me gjykim të shkurtuar; dhe për Henerigert Mitrin 9 vjet burg, 6 vjet me gjykim të shkurtuar.

Masat konkrete të dënimit të caktuara nga trupi gjykues për secilin të pandehur nuk janë bërë ende publike.