Dosja e Ksamilit: turisti 20-vjeçar u fut në det për t'i shpëtuar sulmit, doli i gjakosur

Katër minuta. Kaq zgjati, sipas orëve të regjistruara nga kamerat e sigurisë, gjithçka që e shndërroi një sherr në plazhin e Ksamilit në një vrasje. Në fund të tyre, turisti 20-vjeçar Luis Miguel Varela Mendes doli nga uji me bluzën e bardhë të mbuluar me gjak.

Dinamika e ngjarjes gjendet në dosjen e Prokurorisë së Sarandës, e cila e ngarkon me akuzën e vrasjes Sokrat Lipanin, i njohur edhe si Sokrat Vata. Sipas prokurorisë, ai iu afrua të riut gjatë përleshjes dhe e goditi disa herë me thikë në trup. Ndaj tij, si ndaj çdo personi tjetër të përmendur në dosje, vlen prezumimi i pafajësisë derisa gjykata të vendosë ndryshe.

Gjithçka nis rreth orës 05:15 të 18 gushtit 2026. Në orën 05:14:24, nga ambientet e lokalit "Principotes" dalin disa persona dhe qëndrojnë te rëra pranë mjedisit të jashtëm të subjektit "Paradise". Mes tyre janë identifikuar Ibrahim Lemoie, Sudae Akmahmat, Florian Cetina dhe Luis Mendes, ky i fundit i veshur me një bluzë të bardhë me një shkrim me ngjyrë të zezë nga mbrapa.

Një minutë më vonë, në 05:15:22, nga ana e parkimit në krahun jugor të "Principotes" afrohen dy persona: përpara David Heurtevent, pas tij Sokrat Lipan (Vata), me këmishë të bardhë. Në 05:16:39 Lipani shtyhet me një person të veshur me bluzë të bardhë, largohet dhe shkon drejt shezlongeve. Në 05:16:47 ai ndjek nga pas një nga personat e veshur me të bardha, në drejtim të parkimit.

Në 05:16:54 Lipani vjen me vrap drejt Ibrahim Lemoiet, i cili përplaset në shezlongë dhe bie në tokë, dhe godet në drejtim të tij. Njëzet sekonda më pas, në 05:17:14, ndërhyn Luis Mendes: e shtyn me trup Lipanin, i cili bie përtokë. Ai ngrihet dhe fillon ta godasë 20-vjeçarin. Në 05:17:20 Heurteventi bashkohet me Lipanin dhe të dy godasin Mendesin, ndërsa Sudae Akhmat vjen për të ndihmuar shokun e tij dhe godet Lipanin.

Mes orëve 05:17:35 dhe 05:17:46, sipas dosjes, Serxhi Selimi godet me grushte shtetasin francez Ibrahim Lemoie. Në të njëjtat çaste Luis Mendes, për t'u shmangur nga goditjet që po merrte nga Lipani dhe Heurteventi, largohet me nxitim dhe futet brenda në det.

Deti nuk i jep strehë. Në 05:17:53, kur i riu afrohet nga ana jugore e plazhit, aty ku ndodheshin kamarierët, goditet me grushte nga Serxhi Ademi dhe shtyhet sërish në ujë. Në 05:18:04 ai del nga deti dhe ecën drejt shezlongeve të plazhit "Paradise", me bluzën e bardhë të gjakosur.

Sekuencat e fundit të regjistruara tregojnë largimin e dy personave. Në 05:18:24 David Heurtevent shkon drejt ambienteve të brendshme të "Principotes", i gjakosur në pjesën e përparme të veshjes dhe duke u fshehur. Në 05:20:28 largohet Sokrat Lipani, po ashtu me bluzën e bardhë të gjakosur, i shoqëruar nga pas nga kamarieri Ildi Cekani, në drejtim të lokalit "Principotes".