Djegie në 85% të trupit pas zjarrit te hoteli "Brooklyn", 25-vjeçarja niset drejt Turqisë

Me djegie në rreth 85% të sipërfaqes së trupit, një 25-vjeçare është nisur drejt Turqisë për trajtim të specializuar. Pacientja, e identifikuar me iniciale si A. D., u plagos rëndë dy ditë më parë nga zjarri që përfshiu hotelin "Brooklyn" në Vlorë, ku po qëndronte për pushime.

Përpara se të transferohej jashtë vendit, ajo qëndroi nën kujdesin e ekipeve të terapisë intensive në Qendrën Spitalore Universitare "Nënë Tereza". Pas përfundimit të procedurave mjekësore dhe administrative, spitali njoftoi se pacientja do të vijojë trajtimin në një spital në Turqi.

Zjarri shpërtheu në orët e para të mëngjesit të së dielës në hotelin "Brooklyn", në zonën e Lungomares. Sipas policisë, flakët dyshohet se nisën nga djegia e prizës së një frigoriferi në restorantin e hotelit dhe më pas u përhapën në godinë.

Gjashtë pushues mbetën të plagosur nga ngjarja, pesë prej tyre nga Kosova dhe një nga Rrësheni.