Divjakë: Rikthehet me pistoletë me silenciator për të vrarë, policia ndal ekzekutimin në minutën e fundit

Një përleshje me sende të forta në një lokal në Divjakë ishte gati të përfundonte me gjak. Sipas Policisë së Shtetit, njëri nga të përfshirët në konflikt u largua, u armatos me një pistoletë me silenciator dhe u rikthye disa orë më vonë te i njëjti lokal për të vrarë kundërshtarin e tij. Ndërhyrja e shërbimeve të policisë e ndaloi atë para se të qëllonte.

Operacioni, i koduar “Crime Prevented”, u finalizua nga Komisariati i Policisë Divjakë në bashkëpunim me strukturat e Hetimit të Krimit në Drejtorinë Vendore të Policisë Fier. Në përfundim të tij u arrestuan gjashtë shtetas dhe u sekuestruan dy armë zjarri pistoleta, njëra me silenciator.

Sipas policisë, gjithçka nisi kur Komisariati i Divjakës mori njoftim se në një lokal, në pronësi të shtetasit Z. K., 50 vjeç, po zhvillohej një konflikt me sende të forta. Në vendngjarje, policia gjeti të dëmtuar dy persona, O. L., 22 vjeç, dhe Sh. Xh., 51 vjeç. Të dy morën mjekim, dhanë deklarimet e tyre në Komisariat dhe më pas u larguan drejt banesave.

Ndërsa policia vijonte veprimet për të dokumentuar konfliktin dhe për të identifikuar personat e tjerë të përfshirë, mësoi në rrugë operative se O. L. ishte rikthyer te lokali disa orë më vonë, i armatosur me një pistoletë me silenciator. Sipas policisë, dyshohet se ai kishte për qëllim të vriste Sh. Xh. Ndërhyrja në kohë e shërbimeve të policisë e parandaloi vrasjen.

Në vijim të veprimeve, specialistët e Hetimit të Krimeve vunë në pranga gjashtë shtetas. O. L., 22 vjeç, sipas policisë me precedent penal në fushën e prodhimit dhe shitjes së narkotikëve në Shqipëri dhe Belgjikë, u kap me pistoletën me silenciator, që kishte fishek në fole, gati për qitje. K. S., 45 vjeç, me precedent penal për narkotikë në Shqipëri, u gjet me një pistoletë gjatë kontrollit të automjetit. S. D., 28 vjeç, gjithashtu me precedent penal për narkotikë në Shqipëri, drejtonte automjetin me të cilin O. L. ishte rikthyer te lokali. S. A., 30 vjeç, dyshohet se tentoi të largonte armën e zjarrit nga automjeti i K. S.

Në pranga përfunduan edhe pronari i lokalit, Z. K., 50 vjeç, i akuzuar për moskallëzim krimi, si dhe Sh. Xh., 51 vjeç — vetë personi që dyshohet se do të ishte viktima — po ashtu për moskallëzim krimi, pasi sipas policisë gjatë hetimit rezultoi se në deklarimin e tij nuk kishte treguar të vërtetën për konfliktin.

Si provë materiale u sekuestruan dy armë zjarri pistoleta, njëra me silenciator, katër automjete dhe gjashtë aparate celulare. Armët do t’i nënshtrohen ekspertimit përkatës. Policia bëri të ditur se veprimet hetimore vijojnë për dokumentimin e plotë të rrethanave të konfliktit, përcaktimin e përgjegjësive dhe dokumentimin e aktivitetit kriminal të personave të përfshirë.