Dita e gjashtë e bllokadës: Aleanca hyn krah PDK-së para Qeverisë, sërish bllokohet hyrja

Protesta para objektit të Qeverisë së Kosovës u zgjerua të enjten, në ditën e gjashtë të aksionit. Deputetët e Partisë Demokratike të Kosovës (PDK) vazhduan të bllokojnë hyrjen e ndërtesës, ndërsa këtë herë atyre iu bashkuan deputetë të Aleancës dhe asamblistë të PDK-së nga Komuna e Vushtrrisë.

Kërkesa mbetet e njëjta: thirrja e vazhdimit të seancës konstituive dhe zhbllokimi i procesit të konstituimit të Kuvendit të Kosovës.

Deputetja e Aleancës, Time Kadrijaj, e ngriti tonin ndaj kryeministrit në detyrë. Sipas saj, e vetmja kërkesë e protestuesve është respektimi i rendit kushtetues dhe i afateve të përcaktuara nga Gjykata Kushtetuese për konstituimin e Kuvendit dhe zgjedhjen e presidentit.

"E gjithë ajo që po kërkojmë është të respektohet Kushtetuta e Republikës së Kosovës dhe vendimi i Gjykatës Kushtetuese, i cili e ka përcaktuar qartë periudhën kohore brenda së cilës duhet të konstituohet Kuvendi dhe të bëhet zgjedhja e presidentit. Pikërisht për këtë arsye kërkojmë që të respektohet ligji. Askush nuk është mbi ligjin dhe mbi ligjin nuk është as Albin Kurti, i cili po mendon se është njëfarë shefi dhe mund ta interpretojë ligjin e Kushtetutën ashtu siç dëshiron vetë", deklaroi Kadrijaj.

Ajo shtoi se institucionet duhet të funksionojnë në përputhje me Kushtetutën dhe ligjet e Republikës së Kosovës.

PDK-ja prej disa ditësh po zhvillon aksione para ndërtesës së Qeverisë, duke i kërkuar vazhdimisht kryesuesit të seancës konstituive, Avni Dehari, që të thërrasë vazhdimin e saj. Partia ka akuzuar Lëvizjen Vetëvendosje dhe kryeministrin në detyrë, Albin Kurti, për bllokimin e institucioneve. Nga ana e saj, Aleanca ka kundërshtuar zvarritjen e procesit të konstituimit dhe ka kërkuar kthimin e vendit në funksionalitet institucional.