Digjet garazhi i familjes së gazetarit Vudi Xhymshiti, ai aludon se shkak është profesioni tij

Shtëpia e prindërve të ndjerë të gazetarit Vudi Xhymshiti në fshatin Livoç i Poshtëm të Gjilanit është goditur sërish nga zjarri. Këtë herë flakët përfshinë garazhin, ku ndodhej një veturë e viteve '80 që u dogj.

Ekipi i KALLXO.com, i cili ishte në vendin e ngjarjes më 26 shtator 2026, pa se zjarri kishte kapur garazhin e shtëpisë. Rastin në polici e ka denoncuar motra e gazetarit. Në vendngjarje dolën hetuesit e stacionit policor dhe ata të hetimeve rajonale, ndërsa Policia e Rajonit të Gjilanit ende nuk ka dhënë një konfirmim zyrtar për shkakun e zjarrit apo për ndonjë autor të mundshëm.

Xhymshiti reagoi po të njëjtën ditë në rrjetet sociale, ku kujtoi se kjo shtëpi ishte djegur edhe në vitin 1999, gjatë luftës në Kosovë. "Kjo është shtëpia e prindërve të mi të ndjerë. Sot është e djegur përsëri… Për mua, ky sulm lidhet drejtpërdrejt me punën time si gazetar dhe me përpjekjen për të më frikësuar e heshtuar", shkroi ai.

Gazetari u ka kërkuar autoriteteve që ta hetojnë rastin dhe ka deklaruar se nuk do të ndalet në punën e tij. Lidhja që ai bën mes zjarrit dhe veprimtarisë së tij gazetareske mbetet për t'u verifikuar nga hetimi policor.