Diaspora del para OKB-së në Nju-Jork: protestë e martën për ish-krerët e UÇK-së

Vendimi i Speciales ndaj ish-krerëve të UÇK-së e ka nxjerrë reagimin e diasporës shqiptare në një nga sheshet më simbolike të Nju-Jorkut. Të martën, më 22 shtator, në orën 18:00, para selisë së Kombeve të Bashkuara do të mbahet një protestë paqësore në mbështetje të tyre.

Tubimi është njoftuar nga platforma "Liria ka Emër", e cila ka publikuar datën, orën dhe lokacionin e protestës. Vendi i caktuar është Dag Hammarskjöld Plaza, në East 47th Street, mes 1st dhe 2nd Avenue, pikërisht përballë ndërtesës së OKB-së.

Sipas njoftimit, thirrja për protestë ka ardhur nga pjesëtarë të komunitetit shqiptaro-amerikan. "Të martën, më 22 shtator, në orën 18:00 do të mbahet një protestë para ndërtesës së OKB-së në NEW YORK të SHBA-ve. Kjo protestë është thirrur nga pjesëtarët e komunitetit shqiptaro-amerikan", thuhet në njoftimin e platformës, ku jepet edhe adresa e saktë e tubimit.

Materiali i përgatitur për protestën mbart edhe një moto: "Një popull, një histori, një drejtësi, një e ardhme më e ndritshme".

Reagimet brenda Kosovës janë shfaqur po ashtu publikisht. Daut Haradinaj ka publikuar foto nga sheshi, duke shkruar: "Sot ose i gëzohesh dënimit si Serbia, ose e kundërshton si shqiptar". Nga ana tjetër, Baraliu ka deklaruar se "Kosova është në emergjencë kombëtare pas vendimit të Hagës, kërkohet mobilizim dhe unitet politik".

Numri i pjesëmarrësve të pritur në tubimin e Nju-Jorkut nuk është bërë i ditur nga organizatorët.