Dhoma e torturës në Lipjan: nis gjykimi ndaj ish-gardianes serbe për krime lufte

Rreth 27 vjet pas luftës, dëshmitë e të burgosurave shqiptare të mbajtura në paralelen për gra në Lipjan janë kthyer në sallë gjyqi. Në Gjykatën Themelore në Prishtinë ka nisur seanca gjyqësore ndaj Nadica Cepkenoviqit, e akuzuar për krime lufte të kryera gjatë luftës në Kosovë.

Akuzat lidhen me periudhën kur ajo shërbente si gardiane në burgun e Prishtinës, në paralelen për gra në Lipjan. Sipas aktakuzës së Prokurorisë Speciale të Republikës së Kosovës, gjatë viteve 1998-1999 Cepkenoviq, në bashkëkryerje edhe me gardiane të tjera, dyshohet se kishte keqtrajtuar dhe torturuar në mënyrë sistematike të burgosura shqiptare.

Prokuroria pretendon se të burgosurat ishin rrahur me mjete të ndryshme, përfshirë shkopinj gome, si edhe me shqelma dhe grushte, duke u shkaktuar lëndime trupore. Aktakuza përshkruan gjithashtu pasoja të rënda fizike dhe psikologjike që, sipas Prokurorisë, viktimat i kanë përjetuar si rrjedhojë e këtyre veprimeve.

Aktakuza është ngritur më 16 janar 2026 nga Prokuroria Speciale. Cepkenoviq akuzohet për veprën penale "Krime kundër popullatës civile", sipas nenit 142 lidhur me nenin 22 të Ligjit Penal të RSFJ-së.

Të akuzuarat konsiderohen të pafajshme derisa të vërtetohet e kundërta me vendim të formës së prerë të gjykatës.