Deri në 50 euro në muaj për faturat e rrymës: 15 milionë euro për familjet në nevojë

Deri në 50 euro në muaj: aq mund të arrijë mbështetja për familjet në gjendje të rëndë ekonomike në Kosovë për të përballuar faturat e energjisë elektrike. Shifrën e dha deputetja e Lëvizjes Vetëvendosje (LVV), Fatmire Mulhaxha-Kollçaku, gjatë një fjalimi në Kuvendin e Kosovës kushtuar programit të subvencionimit.

Sipas Mulhaxha-Kollçakut, programi është miratuar nga qeveria dhe për zbatimin e tij janë planifikuar rreth 15 milionë euro. "Pikërisht për këto familje, qeveria ka miratuar programin e subvencionimit të faturave të energjisë elektrike, për çka janë planifikuar rreth 15 milionë euro", deklaroi ajo.

Deputetja e paraqiti masën si një mënyrë për t'ua lehtësuar barrën financiare qytetarëve që kanë më së shumti nevojë për mbështetje, duke e lidhur atë drejtpërdrejt me linjën e qeverisë. "Ky vendim është pjesë e politikës sonë qeverisëse, t’i përdorim mjetet publike për t’u lehtësuar jetën qytetarëve duke u dhënë përparësi atyre që kanë më shumë nevojë", u shpreh Mulhaxha-Kollçaku.

Kriteret për përzgjedhjen e familjeve përfituese dhe data kur do të nisin pagesat nuk u bënë të ditura në fjalimin e saj.