Deri në 4 mijë euro për migrant: aktakuzë ndaj shtatë vetave për kontrabandë nëpër male

Deri në katër mijë euro për çdo migrant: aq kushtonte, sipas akuzës, rruga e plotë drejt Evropës që shtatë persona pretendohet se e organizonin përmes shtigjeve malore mes Shqipërisë dhe Kosovës.

Prokuroria Speciale e Republikës së Kosovës ka ngritur aktakuzë ndaj B.H., A.B., Sh.T., E.Zh., G.Sh., A.M. dhe L.A. për veprat penale "Pjesëmarrja apo organizimi i grupit kriminal të organizuar" dhe "Kontrabandimi me migrantë". Veprimet që u atribuohen të pandehurve përfshijnë periudhën 2023-2024.

"Sipas aktakuzës, të pandehurit B.H., A.B., Sh.T., E.Zh., G.Sh., A.M. dhe L.A. gjatë viteve 2023-2024, në territorin e Republikës së Kosovës, kanë vepruar si pjesë e një grupi kriminal të organizuar, me qëllim të kontrabandimit të migrantëve për përfitim të kundërligjshëm material", thuhet në njoftimin e Prokurorisë.

Prokuroria e përshkruan grupin si një strukturë të qëndrueshme kriminale, me role të ndara, planifikim paraprak dhe koordinim të vazhdueshëm. Sipas saj, të pandehurit kanë organizuar dhe mundësuar kalimin e shtetasve të huaj nga Siria, Afganistani, Iraku dhe vende të tjera të Lindjes së Mesme e të Azisë, të cilët nuk kishin dokumente të rregullta për hyrje apo qëndrim në Kosovë.

Skema, ashtu siç paraqitet në aktakuzë, niste në territorin e Shqipërisë, ku migrantët pretendohet se siguroheshin nga grupi. Prej andej ata futeshin në mënyrë të kundërligjshme në Kosovë, larg pikave të autorizuara kufitare, nëpër shtigje malore dhe rrugë alternative në zonën Gorozhup-Vërmicë.

Pagesa deri në katër mijë euro për person, sipas Prokurorisë, mbulonte të gjithë itinerarin e migrimit drejt Evropës, jo vetëm kalimin në Kosovë.

Akuzat tani i kalojnë gjykatës për shqyrtim. Deri në një vendim të formës së prerë, të shtatë të pandehurit konsiderohen të pafajshëm.