Kadrijaj mohon foton me personin që kërcënoi Haradinajn: Imazh me inteligjencë artificiale

Një fotografi e qarkulluar në rrjetet sociale, ku deputetja e Aleancës, Time Kadrijaj, pretendohet se paraqitet e takuar me Skënder Llugiqin — personin i cili u arrestua për kërcënime ndaj Ramush Haradinajt — është mohuar prerë nga vetë Kadrijaj, e cila e cilëson imazhin si prodhim të inteligjencës artificiale.

Fotografia u publikua në rrjetet sociale nga një person i identifikuar si Vudi Xhymshiti. Përmes një postimi në Facebook, Kadrijaj ka hedhur poshtë çdo takim me Llugiqin dhe ka paralajmëruar se do t’i drejtohet drejtësisë.

“Të nderuar qytetarë, se ku ka arritur poshtërsia e këtij pushteti po e dëshmoj tani. Me inteligjencë artificiale e postuar nga Vudi Xhymshiti në rrjete sociale, se gjoja unë kam takuar Skënder Llugiqin, personin që ka kërcënuar Komandantin Ramush Haradinaj. Kjo nuk qëndron dhe është e pavërtetë. Personin në fjalë do ta denoncoj dhe le të merren organet e drejtësisë me të. Jeni në rënie të lirë, kësaj radhe ju ka dalë fytyra e vërtetë”, shkroi ajo.

Skënder Llugiqi u arrestua një ditë më parë pasi kërcënoi Haradinajn. Fotografia e kontestuar e lidh emrin e deputetes së Aleancës me këtë rast, pretendim që Kadrijaj e quan të pavërtetë.

Deri më tani, autenticiteti i fotografisë nuk është vërtetuar në mënyrë të pavarur dhe nuk ka reagim publik nga organet e drejtësisë lidhur me denoncimin e paralajmëruar.