Përplasje për milionat e komunave: AKK-ja kërkon dokumentet, Krasniqi mbron shifrat

"Ku janë mjetet? Cilat komuna përfituan?" Me këto pyetje, drejtori ekzekutiv i Asociacionit të Komunave të Kosovës (AKK), Sazan Ibrahimi, ka hapur raundin e ri të përplasjes me ministrin në detyrë të Administrimit të Pushtetit Lokal, Elbert Krasniqi, për paratë e destinuara për pushtetin lokal.

Reagimi i AKK-së erdhi pasi Krasniqi deklaroi se buxheti për komunat është rritur me 66 për qind dhe se Asociacioni duhet të jetë "zë i 38 komunave", duke kundërshtuar kritikat për mënyrën e financimit të nivelit lokal. Ibrahimi tha se nuk ka qëllim të merret me sulme personale, por se u detyrua të përgjigjet pasi u përmend sërish nga ministri. Ai ndaloi edhe te një saktësim që e quajti "dallim elementar": "Unë nuk jam kryetar i Asociacionit të Komunave të Kosovës. Jam drejtor ekzekutiv".

Thelbi i kundërshtimit mbetet Granti i Performancës. Sipas Ibrahimit, pesë komunave fituese të këtij granti u janë ndarë vetëm 2 milionë euro, ndërsa në buxhet ishin paraparë 4 milionë. "Pse u ridestinuan mjetet e komunave fituese? Sipas cilave kritere? Dhe si mbrohet skema e performancës kur fituesve u zvogëlohet financimi?", ka pyetur ai.

Krasniqi e kishte arsyetuar këtë duke thënë se 25 për qind e mjeteve ishin orientuar në një program tjetër investimesh, pasi disa komuna kishin kapacitete të kufizuara administrative dhe njerëzore për t'i shpenzuar fondet brenda afateve. Ibrahimi kërkon që ministria të publikojë të dhënat dhe kriteret mbi të cilat është vlerësuar ky kapacitet, duke këmbëngulur se përgjegjësia nuk mund të zhvendoset te niveli lokal: "Nëse ministria i vonoi fondet, nuk mund t'ua faturoni komunave pasojat e vonesës".

Kërkesa më e drejtpërdrejtë për dokumente lidhet me 10 deri në 14 milionë euro të Bashkimit Evropian, të cilat, sipas drejtorit ekzekutiv të AKK-së, ishin të dedikuara për Grantin e Performancës. "Cili ishte rezultati? Ku janë mjetet? Cilat komuna përfituan? Nëse nuk kanë humbur, publikoni dokumentet. Nëse kanë humbur, tregoni pse dhe kush mban përgjegjësi", ka kërkuar ai.

Ibrahimi ka kundërshtuar edhe mënyrën se si paraqitet rritja e buxhetit komunal, duke theksuar se përveç rritjes nominale duhet marrë parasysh inflacioni dhe fuqia reale blerëse e buxheteve. Sipas tij, kërkesat e Asociacionit kanë të bëjnë me interesat e komunave dhe jo me interesa personale.

"Kërkesat për transparencë nuk janë panik. Kërkesat për llogaridhënie nuk janë dezinformim. Dhe mbrojtja e interesave të komunave nuk është interes personal. Më pak etiketime. Më shumë përgjigje", ka përfunduar ai.