Dëm prej 15,7 milionë eurosh: Naser Hafizi deklarohet i pafajshëm në gjykatë

"Deklarohem plotësisht i pafajshëm." Me këtë fjali të shkurtër, Naser Hafizi, ushtrues i detyrës së drejtorit të Autoritetit Rajonal të Pellgjeve Lumore (ARPL) në Ministrinë e Mjedisit, Planifikimit Hapësinor dhe Infrastrukturës (MMPHI), u përgjigj të enjten në Gjykatën Themelore në Prishtinë ndaj aktakuzës që e lidh me një dëm prej 15.752.486,07 eurosh për buxhetin e shtetit.

Në seancën fillestare, Hafizi mohoi fajësinë për të tri veprat penale për të cilat e ka akuzuar Prokuroria Speciale e Republikës së Kosovës: "Keqpërdorimi i pozitës apo autoritetit zyrtar", "Shpëlarja e parave" dhe "Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare".

Pas deklarimit, gjyqtari Kujtim Krasniqi e njoftoi Hafizin dhe avokatin e tij, Ahmet Tahiri, se brenda 30 ditëve kanë të drejtë të kundërshtojnë provat dhe të kërkojnë hedhjen poshtë të aktakuzës.

Thelbi i akuzës ka të bëjë me detyrimet që kompanitë ambalazhuese të ujit kishin ndaj shtetit për shfrytëzimin e ujit. Në njoftimin e Prokurorisë Speciale thuhej: "Sipas aktakuzës, N.H. gjatë viteve 2021-2023, në cilësinë e personit zyrtar në Ministrinë e Mjedisit, ka tejkaluar kompetencat ligjore dhe nuk i ka përmbushur detyrat zyrtare, dhe me qëllim që operatorëve ekonomikë të caktuar, ambalazhues të ujit, t’u mundësojë përfitime pasurore të kundërligjshme, duke i shkaktuar dëm buxhetit të shtetit në shumën e përgjithshme prej 15.752.486,07 euro".

Prokuroria përshkruan edhe mënyrën se si, sipas saj, u zbatua skema. Së pari, Hafizi akuzohet se nuk i dërgoi të gjithë operatorët ekonomikë për vlerësim te Grupi Punues Ministror. Më pas, sipas aktakuzës, "Ndërsa, pas pranimit të raportit nga ky grup, N.H. operatorët me qëllim të favorizimit i ka selektuar në tri grupe, duke u mundësuar që detyrimet financiare të përcaktoheshin mbi bazën e raportimeve të tyre të paverifikuara". Prokuroria pretendon gjithashtu se ai nuk i zbatoi vlerësimet e Grupit Punues gjatë caktimit të borxheve, duke ua zvogëluar operatorëve detyrimet financiare për shfrytëzimin e ujit.

Shifrat që qëndrojnë pas rastit janë të mëdha. Sipas Prokurorisë Speciale, borxhi i operatorëve ekonomikë ndaj ARPL arrinte afër 20 milionë euro, ndërsa raporti i Grupit Ministror i llogariste borxhet totale në 19.297.447,67 euro. Në vendimin për paraburgim thuhej se Hafizi dyshohej se kishte nisur në mënyrë të kundërligjshme nxjerrjen e vendimeve për zvogëlimin e këtyre borxheve, duke vepruar në kundërshtim me Ligjin për Ujërat e Kosovës dhe me udhëzimin administrativ Nr. 06/2021 për Strukturën e pagesave ujore, si dhe duke anashkaluar raportin e Grupit Ministror.

Akuzat nuk ndalen te vendimet administrative. Prokuroria pretendon se ekziston dyshim i bazuar që Hafizi futi para në dorë në sistemin bankar, me qëllim që paratë e fituara në mënyrë të kundërligjshme të dukeshin të ligjshme. Ai dyshohet edhe se nuk e deklaroi saktë pasurinë: për vitin 2020 nuk e deklaroi banesën në rrugën "Bill Klinton", në vitin 2022 kishte blerë një banesë tjetër në Fushë-Kosovë, ndërsa banesën e blerë në vitin 2023, të cilën duhej ta deklaronte në vitin 2024, nuk e deklaroi.