Del nga burgu David McBride, ushtaraku që zbuloi krimet e luftës në Afganistan

David McBride, ish-juristi i ushtrisë australiane i dënuar për vjedhjen e dokumenteve sekrete të mbrojtjes mbi luftën në Afganistan dhe kalimin e tyre te media, është liruar të enjten nga burgu në Kanberra. Lirimi i tij me kusht u miratua nga prokurorja e përgjithshme, Michelle Rowland, pasi ai kishte vuajtur plot 27 muaj nga dënimi.

McBride ishte dënuar në maj të vitit 2024 me një dënim maksimal prej pesë vjet e tetë muaj burg, por po lirohet me kusht pasi përfundoi periudhën e plotë të pakushtëzuar prej 27 muajsh. Ai u deklarua fajtor për tre akuza në nëntor, pasi Gjykata Supreme e ACT-së pranoi ndërhyrjen e qeverisë federale për të mbajtur të fshehta prova kyçe, që sipas autoriteteve kishin potencialin të rrezikonin "sigurinë dhe mbrojtjen e Australisë". Akuzat përfshinin vjedhjen e informacionit shtetëror dhe kalimin e tij te gazetarët e transmetuesit publik ABC.

Një zëdhënëse e Rowland ia konfirmoi lirimin Guardian Australia. "Lirimi me kusht i zotit McBride u shqyrtua dhe u miratua," tha ajo, duke shtuar se "qeveria nuk jep koment apo detaje specifike për çështjet individuale të lirimit me kusht".

Pas vendimit, McBride lëshoi një deklaratë ku falënderoi prokuroren e përgjithshme "për shmangien e një beteje tjetër të gjatë rreth çështjes së lirimit me kusht". "Në fund të fundit, të dy duam të njëjtën gjë, një Australi më të mirë për fëmijët tanë, ndaj duket humbje kohe të luftojmë kundër njëri-tjetrit, në vend që të punojmë së bashku," tha ai.

Në po atë deklaratë, McBride bëri të ditur se është diagnostikuar me kancer të mushkërive të trajtueshëm, aktualisht në fazat e hershme, dhe pritet t'i nënshtrohet operacionit së shpejti. Ai njoftoi se do të japë një deklaratë më të plotë në një moment të mëvonshëm dhe falënderoi familjen, oficerët e burgut dhe bashkëvuajtësit e tij. "Shumë prej tyre më falënderuan që u lejova të besojnë sërish në këtë vend; nga ana ime, i falënderoj që më treguan se ka kaq shumë njerëz të mirë në botë për të cilët ia vlen të luftosh," tha ai.

Çështja e tij lidhet me një nga zbulimet më të bujshme gazetareske të Australisë. McBride mblodhi kryesisht informacione ushtarake sekrete gjatë një periudhe 18-mujore në vitet 2014 dhe 2015 dhe ia dorëzoi gazetarëve të transmetuesit publik. Materiali shërbeu si bazë për një seri hetimore me titull "The Afghan Files", që nxori në dritë krime lufte të kryera nga personeli i mbrojtjes australiane në Afganistan. Gjykata dëgjoi se gjithsej 235 dokumente u morën nga McBride prej zyrave të mbrojtjes — kryesisht në ACT — mes majit 2014 dhe dhjetorit 2015, prej të cilave 207 ishin të klasifikuara si sekrete dhe disa të shënuara si dokumente kabineti.

Lirimi i tij u përshëndet nga mbështetësit e transparencës. Ish-senatori i pavarur dhe aktivisti Rex Patrick tha se McBride do të largohej nga burgu me kokën lart: "David u shërbeu australianëve, si në ushtri ashtu edhe në aktin e tij të guximshëm të nxjerrjes në pah të krimeve të luftës që ndodhën në Afganistan. Është shumë mirë të shohësh fundin e një sage të tmerrshme që nuk duhej të kishte ndodhur kurrë." Edhe Gabriel Shipton, themelues i The Information Rights Project dhe vëlla i Julian Assange, lavdëroi qeverinë për vendimin, si dhe për ndihmën e dhënë ndaj vëllait të tij.