Dajti, Çika dhe Bulqiza në flakë: 21 vatra në 24 orë, 354 forca dhe dy Air Tractor në terren

Njëzet e një vatra zjarri janë raportuar brenda 24 orëve të fundit në Shqipëri. Gjashtë prej tyre janë ende aktive dhe shtatë mbahen nën mbikëqyrje, sipas bilancit të Ministrisë së Mbrojtjes.

Në operacionet për menaxhimin e situatës janë angazhuar 354 forca operacionale dhe 24 automjete zjarrfikëse. Ato mbështeten nga 155 efektivë të Forcave të Armatosura, 3 automjete zjarrfikëse, 1 ekskavator i rëndë, 3 helikopterë dhe 2 avionë Air Tractor.

Në Malin e Dajtit operacioni vijon me mbështetjen e 30 efektivëve të Forcave të Armatosura. Një ditë më parë aty ishin angazhuar 25 efektivë të Mbrojtjes nga Zjarri dhe Shpëtimit, 5 nga Agjencia për Zhvillimin e Mbrojtjes Civile, 30 ushtarakë, si dhe kapacitetet ajrore. Zonat e banuara nuk rrezikohen.

Zjarri është riaktivizuar sot në dy vatra në Qafë të Helmës në Bulqizë, në një pyll me pisha të dendura. Për vendosjen e situatës nën kontroll janë angazhuar 11 efektivë të Mbrojtjes nga Zjarri dhe Shpëtimit.

Në Mirditë tabloja është e ndarë. Në Shtuf vatra mbetet aktive, por me intensitet të ulët, dhe po monitorohet nga strukturat vendore. Në Shtanë-Tenë situata paraqitet e stabilizuar, ku puna vijon me 6 efektivë të Mbrojtjes nga Zjarri dhe Shpëtimit, 6 punonjës të shërbimit pyjor dhe 15 forca bashkiake. Banesat nuk rrezikohen.

Në Prozhem të Pukës flakët vijojnë të përfshijnë sipërfaqe pyjore, me strukturat vendore dhe 30 efektivë të Forcave të Armatosura në terren. Aktualisht nuk ka rrezik për banesat. Në Gjegjan, Gojan të Vogël dhe Gojan të Madh situata është izoluar ose shuar dhe mbahet nën mbikëqyrje.

Rasti më i vështirë mbetet Mali i Çikës mbi Palasë, ku vatra po digjet në terren të thepisur dhe të paaksesueshëm. Operacioni për fikjen përfundimtare mbështetet sot nga dy avionë Air Tractor.

Pavarësisht terrenit të vështirë dhe ndikimit të erës në disa zona, situata në disa prej vatrave kryesore është përmirësuar. Operacionet po fokusohen te izolimi i vatrave aktive, parandalimi i riaktivizimeve dhe mbrojtja e zonave të banuara.

Agjencia Kombëtare e Mbrojtjes Civile njofton se po ndjek pa ndërprerje situatën në të gjithë territorin, në koordinim me prefekturat, bashkitë dhe strukturat e sistemit të Mbrojtjes Civile, ndërsa kapacitetet operacionale mbeten në gatishmëri për të ndërhyrë aty ku kërkohet, me prioritet mbrojtjen e jetës, banesave dhe pasurisë së qytetarëve.