Spitali i Pejës distancohet nga aktakuza: Asnjë kontratë me operatorin e tenderit

Spitali i Përgjithshëm i Pejës ka dalë publikisht për t'u distancuar nga aktakuza e ngritur lidhur me një aktivitet prokurimi të këtij institucioni, duke theksuar se vetë spitali nuk është subjekt i akuzës.

Në sqarimin e tij për opinionin publik, institucioni shëndetësor sqaron se me operatorin ekonomik ndaj të cilit është ngritur aktakuza nuk ka lidhur kontratë, as më herët e as në kuadër të procedurës për të cilën bëhet fjalë.

Sipas spitalit, aktiviteti i prokurimit në fokus kishte të bënte me furnizimin me libra të Protokollit. Operatori ekonomik në fjalë kishte dorëzuar ofertë pas thirrjes publike, por pas procesit të vlerësimit oferta u eliminua si e papërgjegjshme, në përputhje me kriteret dhe kërkesat e përcaktuara në Dosjen e Tenderit dhe në Njoftimin për Kontratë.

Spitali thotë gjithashtu se, pasi pranoi kërkesat zyrtare nga organet e rendit dhe të drejtësisë, bashkëpunoi menjëherë dhe plotësisht me organet hetimore, duke vënë në dispozicion dokumentacionin e kërkuar për këtë procedurë.

"Spitali i Përgjithshëm i Pejës mbetet i përkushtuar ndaj respektimit të ligjshmërisë, transparencës institucionale dhe përgjegjshmërisë në çdo proces që lidhet me menaxhimin e fondeve publike", thuhet në sqarimin e institucionit.

Rasti ndërlidhet me aktakuzën e njohur më parë publikisht për tenderin e Spitalit të Pejës, ku në qendër të akuzës qëndron dorëzimi i dokumentacionit të kualifikimit, CV dhe diplomë, në emër të një personi tjetër. Për personat e përfshirë vlen prezumimi i pafajësisë deri në një vendim përfundimtar të gjykatës.