Christopher Hill për UÇK-në: Mesazhet nga kreu nuk zbatoheshin poshtë

Një ushtri e bashkuar në qëllim, por jo në komandë. Kështu e përshkruan Ushtrinë Çlirimtare të Kosovës ish-i dërguari amerikan për Kosovën, Christopher Hill, i cili thotë se brenda strukturës së UÇK-së nuk kishte një organizim të mirëfilltë vertikal, ku urdhrat e dhëna në krye të zbatoheshin në nivelet më të ulëta.

Sipas Hillit, synimi për pavarësinë dhe lirinë e Kosovës i bashkonte të gjithë, por vetë funksionimi i organizatës ishte tjetër gjë. Ai thotë se nuk kishte vërejtur që mesazhet e udhëheqjes të përciteshin dhe të ekzekutoheshin nga poshtë.

"UÇK-ja ishte një organizatë, që donte pavarësinë dhe lirinë e Kosovës. Unë nuk ndjeva se kishte ndonjë organizim të mirëfilltë vertikal, ku mesazhet nga kreu do të ekzekutoheshin nga pjesa poshtë. Në atë kohë, kishte shumë njerëz që donin të ishin në krye të UÇK-së, që të ishte ushtri e mirëfilltë, që të merreshin më seriozisht nga vendet e Perëndimit", ka deklaruar diplomati amerikan.

Hill shkon edhe një hap më tej: brenda UÇK-së, sipas tij, kishte përpjekje për të krijuar përshtypjen se bëhej fjalë për një ushtri të mirëorganizuar dhe të disiplinuar, me qëllim që organizata të merrej më seriozisht nga vendet aleate të NATO-s.

Në këtë kontekst, ish-diplomati amerikan thotë se Hashim Thaçi nuk kontrollonte çdo gjë që ndodhte në terren, një pohim që prek drejtpërdrejt debatin për përgjegjësinë komanduese brenda UÇK-së.