Burrë vdes pas dërgimit në QKMF në Leposaviq, trupi dërgohet për obduksion

Një burrë ka humbur jetën mbrëmjen e 4 tetorit në Leposaviq, pak pasi u dërgua në gjendje të rëndë shëndetësore në Qendrën Kryesore të Mjekësisë Familjare (QKMF) të qytetit.

Sipas Policisë së Kosovës, rasti është raportuar rreth orës 21:30 në rrugën magjistrale Leposaviq-Banjskë. Viktima, një mashkull kosovar, ishte sjellë në QKMF për trajtim mjekësor, por mjeku aty ka konstatuar vdekjen e tij. Rrethanat në të cilat burri u gjend në atë gjendje, si dhe shkaku i vdekjes, ende nuk janë bërë të ditura.

Policia ka biseduar me tre dëshmitarë dhe rasti tashmë është në duart e prokurorisë. "Lidhur me rastin janë intervistuar tre dëshmitarë meshkuj kosovarë, ndërsa trupi i pajetë me vendim të prokurorit është dërguar në IML për obduksion", thuhet në raportin e policisë.

Ekzaminimi në Institutin e Mjekësisë Ligjore (IML) pritet të jetë hapi vendimtar për të përcaktuar se si ka ndodhur vdekja.