Dy anije të goditura, një e fundosur: Bullgaria kërkon llogari nga Rusia

Kryeministri i Bullgarisë, Rumen Radev, e ka vënë Rusinë në qendër të dyshimeve pas një sulmi të ri me dronë në Detin e Zi, ku dy anije tregtare u goditën pranë brigjeve bullgare dhe njëra prej tyre përfundoi në fund të detit. Të martën ai thirri ambasadoren ruse, Eleonora Mitrofanova, dhe mblodhi në një mbledhje urgjente krerët e sigurisë.

Sipas Radevit, anija që u fundos ndodhej 17 milje detare (31 kilometra) në lindje të Krapecit. Nga ekuipazhi i saj u shpëtua një person. Kryeministri nuk dha hollësi të tjera për këtë anije. Anija e dytë, në pronësi ukrainase, u godit nga tre dronë rreth 18 milje detare larg qytetit Bjala, por të 15 anëtarët e ekuipazhit u shpëtuan.

Njërën nga anijet e goditura Radev e identifikoi si Chelsea 3, me flamur maltez dhe e regjistruar në Odesë të Ukrainës. Pesë anëtarë të ekuipazhit të saj po trajtohen për lëndime të lehta.

"Një sulm tjetër ndaj anijeve tregtare në afërsi të menjëhershme të ujërave territoriale bullgare është absolutisht i papranueshëm", tha Radev gjatë takimit me krerët e sigurisë.

Kryeministri pranoi se nuk ka prova përfundimtare që fajësojnë "asnjërën palë... logjika sugjeron se rezultati është në dobi të Federatës Ruse".

Mitrofanova, sipas mediave bullgare, i ka thënë Radevit se nuk kishte asnjë informacion nga Ministria ruse e Mbrojtjes për sulmet e fundit. Ajo shtoi se goditjet mund të ishin një provokim nga një palë e tretë. Ushtria ruse nuk ka bërë asnjë koment publik.

Sulmi vjen vetëm një javë pasi dy anije të tjera tregtare u goditën nga dronë detarë dhe ajrorë në zonën ekonomike ekskluzive të Bullgarisë. Atëherë u fundos anija Alfa Watan dhe të 10 anëtarët e ekuipazhit, mes tyre nëntë sirianë, besohen të vdekur. Për ato sulme të 6 tetorit Radev u kishte kërkuar NATO-s dhe BE-së ndihmë teknike në hetim, duke lënë të kuptohej se nuk ishte e qartë nëse pas tyre qëndronte Rusia apo Ukraina.

Tani toni është më i ashpër. Bullgaria është anëtare e NATO-s dhe Radev tha se do të fliste së shpejti me sekretarin e përgjithshëm të aleancës, Mark Rutte. Radevi erdhi në pushtet gjatë verës dhe që atëherë ka hedhur poshtë pretendimet se është "prorus".

Ukraina e ka fajësuar drejtpërdrejt Rusinë për sulmet e fundit. Presidentja e Komisionit Evropian, Ursula von der Leyen, tha të martën se Deti i Zi po kthehet në "një front tjetër përshkallëzimi të luftës ruse në Ukrainë. Kjo është e papranueshme".

Rusia i ka intensifikuar kohët e fundit goditjet ndaj anijeve në Detin e Zi, sidomos në pjesën perëndimore të tij, si pjesë e luftës kundër Ukrainës. Moska pretendon se shënjestron anije që dërgojnë armë dhe ngarkesa me përdorim të dyfishtë drejt porteve ukrainase, duke përmendur sulmet e javës së kaluar në portet e Mikolaivit dhe Çornomorskut, si dhe një në det të hapur. Kievi dhe aleatët e tij evropianë thonë se po sulmohen anije tregtare që transportojnë drithëra dhe mallra të tjera civile.