Unicef: 26 fëmijë humbën jetën në rrëmujën pas zjarrit në Bukavu

Fëmijët ishin në mësim kur flakët u shfaqën pranë shkollës së tyre në Bukavu. Ishte e enjtja, rreth orës 9:00 të mëngjesit (orë lokale dhe orë e Parisit). Zjarri, me origjinë ende të panjohur, shkaktoi një valë paniku dhe një rrëmujë në dalje. Bilanci i saj: të paktën 26 fëmijë të vdekur dhe 25 të tjerë të plagosur.

Shifrat i bëri publike agjencia e Kombeve të Bashkuara për fëmijët, Unicef, në një komunikatë të publikuar të premten, më 11 shtator, ku flitet për humbjen e "jetës së të paktën 26 fëmijëve" dhe për "25 të tjerë të plagosur". Një bilanc i mëparshëm i përkohshëm fliste për 14 fëmijë të vrarë.

Se si vdiqën fëmijët e përshkruan një raport i inspektorëve të Ministrisë së Arsimit Kombëtar të Kongos, i shpërndarë të premten. Rrëmuja çoi, sipas raportit, "në shkeljen me këmbë të fëmijëve që binin përtokë dhe në mbytjen nga tymi të atyre që mbetën të bllokuar brenda".

Bukavu, kryeqendra e provincës së Kivusë së Jugut në lindje të vendit, ka rënë që nga shkurti i vitit 2025 nën kontrollin e grupit të armatosur M23, të mbështetur nga Kigali, i cili ka vendosur atje një administratë paralele. Në një komunikatë të publikuar të premten, M23 njoftoi 26 të vdekur, "njëzet vajza dhe gjashtë djem", dhe shpalli "zi kombëtare treditore". Ceremonia e varrimit të viktimave është paralajmëruar për të shtunën në Bukavu, në prani të autoriteteve të M23-shit. Si autoritetet e Kinshasës, ashtu edhe M23, kanë kërkuar hapjen e hetimeve për të zbardhur shkakun e zjarrit.

Ministria e Arsimit Kombëtar e RDK-së shprehu të enjten "trishtimin e thellë", duke shtuar se kjo "dramë e re ndodh në një kontekst të shënuar nga një varg veçanërisht shqetësues zjarresh në Bukavu". Reagime emocionale erdhën të enjten dhe të premten nga shumë përfaqësues politikë dhe të shoqërisë civile.

Mjeku kongolez dhe fituesi i Çmimit Nobel për Paqe, Denis Mukwege, kërkoi të premten në rrjetin X që të "merren masa me urgjencë të plotë" për të "dërguar ndihmë humanitare" te popullata e Bukavusë. "Dramat" në lokalitetet nën kontrollin e M23-shit, shtoi ai, "nuk duhet të shërbejnë si dekor për mesazhe zyrtare dhembshurie pa asnjë veprim konkret".

Zjarri shkatërroi një zonë të gjerë e të mbindërtuar në shpatin e kodrës, duke lënë pas vetëm gërmadha shtëpish të djegura, të mbuluara me llamarina të përdredhura, sipas konstatimit të enjten të një korrespondenti të Agjencisë France-Presse. Qindra shtëpi u shkatërruan dhe banorët e tyre mbetën pa strehë, sipas një përgjegjësi lokal dhe raportit të Ministrisë së Arsimit.

Bukavu, e vendosur në bregun e liqenit Kivu dhe e njohur për shtëpitë tipike prej druri të grumbulluara në shpatin e kodrës, goditet rregullisht nga zjarre vdekjeprurëse. Sipas specialistëve, fatkeqësi të tilla janë të shpeshta në qytetet e RDK-së, të cilat janë gjerësisht pa pajisje kundër zjarrit, dhe shkaktohen shpesh nga mungesa e distancës mes ndërtesave dhe lidhjet e paligjshme me rrjetin elektrik. Në tetor të vitit 2025, një zjarr mori jetën e 14 personave në Bukavu, mes tyre 12 fëmijë. Në Kinshasa, një zjarr në një sallë dasmash la 12 të vdekur natën e 4 në 5 shtator.