Breshëri plumbash në dasmë: ish-polici dhe bashkëpandehuri mohojnë fajin në Ferizaj

Me armën automatike zyrtare të policisë, në mes të një ceremonie martesore dhe para syve të dhjetëra njerëzve: kështu e përshkruan aktakuza vrasjen e S.S., për të cilën tashmë ka nisur gjykimi në Gjykatën Themelore në Ferizaj.

Në bankën e të akuzuarve janë ulur ish-polici F.R. dhe J.M. Të dy deklaruan se nuk e pranojnë fajësinë.

Sipas aktakuzës, ngjarja ka ndodhur më 16 gusht 2024. F.R. akuzohet se, me dashje dhe paramendim, ka shtënë me breshëri plumbash në drejtim të viktimës, me qëllim hakmarrjeje për motive të pretenduara familjare. Arma që pretendohet se është përdorur ishte arma automatike zyrtare e policisë.

Roli i J.M. në aktakuzë është ai i ndihmësit. Ai akuzohet se, i pajisur me mjete të forta, ka ruajtur perimetrin e sulmit dhe ka penguar çdo ndërhyrje, në mënyrë që ish-polici ta kryente pa pengesë veprën penale të vrasjes së rëndë.

Me mospranimin e fajësisë nga të dy të akuzuarit, akuzat e prokurorisë do të shqyrtohen gjatë procesit gjyqësor. F.R. dhe J.M. konsiderohen të pafajshëm deri në një vendim të formës së prerë të gjykatës.