Katër ditë pa Kuvend: VV kërkon dialog, PDK dhe Aleanca kërcënojnë me protesta

Katër ditë pas ndërprerjes së seancës konstituive të Kuvendit të Kosovës, kriza politike mbetet e ngërçosur: nuk ka ende një datë për rikthimin e deputetëve në sallë, ndërsa partitë vazhdojnë të akuzojnë njëra-tjetrën për bllokadën institucionale.

Lëvizja Vetëvendosje, partia e parë e dalë nga zgjedhjet, i qëndron thirrjes për dialog politik dhe për një tryezë të përbashkët të liderëve. Partitë opozitare e kundërshtojnë një takim të tillë dhe në krahun tjetër kanë rikthyer në tavolinë mundësinë e protestave.

Kryesuesi i seancës konstituive, Avni Dehari, argumentoi se mbajtja e seancave pa një marrëveshje paraprake nuk ka kuptim. "Vetëm për formalitet nëse mbahen seancat njëra pas tjetrës, ku është rezultati, kush është i interesuar nëse nuk ka rezultate vetëm të mbahen seanca kot. Nëse nuk ka marrëveshje, nëse njerëzit ngulin këmbë, me dhunë kërkon s'mund ta detyrosh po nëse qysh po deklarohen, nëse janë për zgjidhje, do t'i thirrin arsyes dhe ta gjenin një marrëveshje edhe shumë lehtë pastaj kriza do të tejkalohej", tha ai.

Nga Vetëvendosja, Mimoza Kusari-Lila e cilësoi të pakuptimtë refuzimin e opozitës për t'u ulur në një tryezë me kryetarin e partisë, Albin Kurti. "Nuk ka alternativë tjetër përpos dialogut politik, arritjes së marrëveshjes politike dhe pranimit të drejtuesve të subjekteve, liderëve politikë e partiakë të Republikës së Kosovës që veç të ulen, të dakordohen dhe të kemi një orar e afat edhe të konstituimit të Kuvendit, të votimit të qeverisë, të zgjedhjes së presidentit. Sinqerisht ndjej keqardhje që komunikimi i drejtuesve politikë, në veçanti të opozitës së deridjeshme po bëhet përmes mediave e jo përmes pranimit ose pjesëmarrjes në takim", deklaroi ajo.

Në anën tjetër, PDK dhe Aleanca e vendosin theksin te rruga e protestës. Mërgim Lushtaku nga PDK e la të hapur këtë opsion: "Për mendimin tim personal duhet të ketë një protestë, duhet të ketë një demonstratë që realisht edhe e kundërshton këtë fyerje të gjithë zgjedhjeve që çdo qytetar del, që të respektohet vullneti i demokracisë. Kjo mbetet e hapur, çdo protestë e mbështesim sepse me të vërtetë çka u bo boll, është bo boll."

Edhe Albana Bytyqi nga Aleanca e cilësoi daljen në rrugë si zgjidhjen e vetme të mbetur, duke përsëritur refuzimin e ftesave për takim. "Rruga e vetme ka mbet vetëm rruga me dal dhe kjo është e padiskutueshme, jemi duke e diskutua si parti, por edhe partitë tjera kështu që po e shohim tash e tutje se si do të veprojmë. Na qysh në fillim i kemi refuzua ftesat dhe do të vazhdojmë t'i refuzojmë. Kërkesat tona janë shumë të qarta dhe shumë të kuptimta kështu që nuk ka nevojë për pjesëmarrje", tha ajo.

Që nga ndërprerja e seancës konstituive, palët kanë komunikuar kryesisht përmes mediave dhe deklaratave, pa u afruar te një marrëveshje për postet kryesore të shtetit. Ndërkohë, data e re për rifillimin e seancës mbetet e paqartë, ndërsa opozita dhe pozita ende nuk gjejnë gjuhë të përbashkët për tejkalimin e ngërçit.