Bllokada e gjashtë ditëve te Qeveria: PDK dhe Aleanca kërcënojnë me protesta masive

Për të gjashtën ditë radhazi, deputetët e Partisë Demokratike të Kosovës (PDK) po bllokojnë hyrjen e Qeverisë së Kosovës, duke kërkuar vazhdimin e seancës konstitutive të Kuvendit. Këtë të enjte atyre iu bashkuan edhe deputetët e Aleancës, duke shtuar presionin ndaj krerëve të Lëvizjes Vetëvendosje.

Deputetja e PDK-së, Ganimete Musliu, tha se veprimet do të vazhdojnë derisa të plotësohet kërkesa e tyre, që sipas saj nënkupton "kthimin e kushtetutshmërisë, ligjshmërisë dhe legjitimitetit të shtetit".

Ajo i drejtoi kërkesë të drejtpërdrejtë liderit të Vetëvendosjes. "Kërkojmë nga deputeti Albin Kurti, njëkohësisht kryetar i Lëvizjes Vetëvendosje, që të tregojë gatishmëri për ndryshim qëndrimi, që të kthehet në Kuvendin e Kosovës", tha Musliu, duke shtuar se ai duhet t'i konstituojë institucionet e vendit për të cilat ka marrë mandatin dhe besimin e qytetarëve.

Deputetja e Aleancës, Time Kadriaj, kërkoi respektimin e Kushtetutës dhe të vendimit të Gjykatës Kushtetuese lidhur me afatet për konstituimin e Kuvendit. Ajo paralajmëroi se, nëse Kurti vazhdon me këtë sjellje, do të organizohen "protesta masive".

"Askush nuk është mbi ligj. Mbi ligj nuk është as Albin Kurti, i cili mendon se është një lloj shefi që mund të veprojë dhe të interpretojë ligjin dhe Kushtetutën ashtu si i konvenon atij. Kjo nuk do të kalojë. Nuk do të pushojmë së organizuari deri në konstituimin e plotë të Kuvendit, si dhe zgjedhjen e Qeverisë", deklaroi Kadriaj.

Të dyja partitë paralajmërojnë protesta dhe kërkojnë rikthimin e seancës konstitutive të Kuvendit të Kosovës.