Beteja për Aeroportin e Vlorës kalon në Londër: Pacolli akuzon qeverinë shqiptare

Konflikti për Aeroportin e Vlorës ka marrë tashmë formën e një përplasjeje ligjore ndërkombëtare. Kompania Mabco, në pronësi të biznesmenit Behgjet Pacolli, ka akuzuar zyrtarisht qeverinë shqiptare para Gjykatës së Arbitrazhit në Londër se po ia merr aeroportin për t'ia kaluar biznesmenit izraelit Ron Yeffet.

Akuza është pjesë e padisë me të cilën Mabco kërkon një masë sigurie lidhur me prishjen e kontratës nga pala shqiptare. Sipas titullit të pretendimit të ngritur, qeveria "po e merr aeroportin e Vlorës për t'ia dhënë Ron Yeffet". Nuk dihet se në çfarë provash e mbështet kompania e Pacollit këtë akuzë.

Lajmi u konfirmua nga dy burime konfidenciale brenda Avokatit të Shtetit dhe Ministrisë së Infrastrukturës, të cilat e kanë lexuar dokumentin. Sipas tyre, avokatët e Pacollit i kanë thënë gjykatës se Yeffet është një biznesmen me lidhje të ngushta me qeverinë shqiptare.

Për këtë përballje, Mabco ka pajtuar studion e njohur amerikane Patton Boggs si përfaqësuese ligjore. Avokatët e saj mbërritën para pak ditësh në Tiranë, ku morën pjesë në një takim të përbashkët të Mabcos, VIA-s dhe 2A Group me Ministrinë e Infrastrukturës. Ai takim ishte përpjekja e parë e palëve për pajtim, pasi qeveria njoftoi nisjen e procedurës për prishjen e koncesionit.

Deri tani asnjëra prej tri kompanive, as Mabco, as VIA dhe as 2A Group, nuk ka hapur arbitrazh në themel kundër Shqipërisë për të kërkuar kompensim. I vetmi proces i nisur është ai në Londër, ku VIA dhe Mabco kërkojnë masë sigurimi për ta detyruar qeverinë të ndalë procedurën e prishjes së kontratës koncesionare.