Bekim Sejdiu tërhiqet nga gara për president: Nuk ka mbështetje në Kuvend

Emri që dy partitë e kishin nxjerrë si dalje nga ngërçi u tërhoq vetë. Bekim Sejdiu, kandidati jopartiak për president të Republikës së Kosovës, njoftoi të hënën se heq dorë nga kandidatura, duke e arsyetuar vendimin me mungesën e mbështetjes së nevojshme parlamentare dhe me përplasjet politike që, sipas tij, e devijuan tërë procesin.

"Në rrethanat e krijuara, të karakterizuara nga mungesa e mbështetjes së nevojshme parlamentare për zgjedhjen time si President dhe nga devijimi i tërë procesit në vorbullën e dinamikave dhe përplasjeve të brendshme politike, kam vendosur të tërhiqem nga kandidatura për President të Republikës së Kosovës", shkroi ai në reagimin e publikuar.

Rrugëtimi i shkurtër i kësaj kandidature nis, sipas rrëfimit të vetë Sejdiut, para dy javëve. Ai u kontaktua nga përfaqësues të Lidhjes Demokratike të Kosovës dhe u ftua në një takim të përbashkët me delegacionet e kryesuara nga liderët e LDK-së dhe të Lëvizjes Vetëvendosje. Aty, thotë ai, u njoftua se pas një procesi shterues bisedimesh dy partitë ishin pajtuar që emri i tij të propozohej si kandidat jopartiak për kreun e shtetit.

Pranimin e kandidaturës ai e lidhi drejtpërdrejt me gjendjen e vendit: "Duke qenë i vetëdijshëm për periudhën e vështirë nëpër të cilën po kalon vendi ynë dhe për rrezikun që kriza institucionale të thellohet, kam pranuar të jem kandidat për President të Republikës së Kosovës". Sejdiu theksoi se nuk ka pasur ambicie për pozita publike përtej atyre akademike e profesionale dhe se motivi i vetëm ishte zhbllokimi i ngërçit institucional. Ai tha se kishte besuar se partitë parlamentare dhe deputetët e Kuvendit do të gjenin forcë për t'i tejkaluar ndasitë politike, për t'i dhënë vendit institucione të qëndrueshme.

Për vendimin e tij, Sejdiu tha se i ka njoftuar më herët përfaqësuesit e LDK-së dhe të Lëvizjes Vetëvendosje. Ai falënderoi mbështetjen e ofruar këto ditë nga kolegë, miq, personalitete publike e të shoqërisë civile dhe, në mënyrë të veçantë, nga mërgata shqiptare në Shtetet e Bashkuara të Amerikës.

Në mbyllje të reagimit, ai u bëri thirrje partive politike të gjejnë zgjidhje dhe të mos e thellojnë polarizimin: "Republika e Kosovës dhe qytetarët e saj nuk kanë nevojë për drama politike dhe thellim të polarizimit, por për maturi dhe bashkim në funksion të forcimit të shtetit tonë". Kosovën e cilësoi "shtëpi jonë e përbashkët", duke shprehur shpresën se partitë do të dalin nga ky rreth vicioz.

Nga LDK-ja dhe Vetëvendosja, të dyja partitë që e propozuan, nuk ka ende një reagim publik ndaj tërheqjes së tij.