BE-ja për protestat pas aktgjykimit të Hagës: E drejtë themelore, EULEX-i funksional

Bashkimi Evropian ka dhënë një mesazh të dyfishtë për protestat që po zhvillohen në Kosovë pas aktgjykimit të Dhomave të Specializuara në Hagë: protesta paqësore është e drejtë e pacenueshme, ndërsa misioni i tij për sundimin e ligjit, EULEX, vazhdon të punojë pa ndërprerje.

Reagimi erdhi nga një zëdhënës i BE-së, në përgjigje të pyetjeve të portalit Front Online. Sipas tij, Brukseli po e përcjell nga afër situatën në Kosovë.

"Demonstratat paqësore janë një e drejtë themelore në një shoqëri demokratike", thuhet në përgjigjen e BE-së, e cila shton se monitorimi do të vijojë: "Ne do të vazhdojmë ta ndjekim nga afër situatën".

Pyetjes për protestat e mbajtura para zyrave të EULEX-it, zëdhënësi iu përgjigj me një sqarim për gjendjen e misionit: "Për informacionin tuaj, mund të konfirmojmë gjithashtu se EULEX-i është plotësisht funksional".

Protestat nisën pas aktgjykimit të 16 shtatorit, me të cilin Dhomat e Specializuara shpallën fajtorë për vepra penale të luftës katër ish-krerë të Ushtrisë Çlirimtare të Kosovës (UÇK). Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet burgim.