BE-ja hesht për nismën e PDK-së: Mbështetja për Specialen mbetet e paprekur

Nga selia e Bashkimit Evropian në Bruksel erdhi një përgjigje që nuk e prek nismën politike në Prishtinë, por e rithekson qëndrimin e vjetër: Dhomat e Specializuara kanë mbështetjen e BE-së dhe ajo nuk po ndryshon.

Zëdhënësi i BE-së, Kristijan Vigand, u pyet në një konferencë për shtyp për nismën e Partisë Demokratike të Kosovës për ndryshimin e ligjit për Dhomat e Specializuara. Ai nuk e komentoi drejtpërdrejt propozimin, por zgjodhi të flasë për rolin e institucionit gjyqësor.

"Dhomat e Specializuara të Kosovës janë një institucion gjyqësor i pavarur, i themeluar me vendim të Kuvendit të Kosovës në vitet 2014-2015, që vepron brenda sistemit juridik të Kosovës", deklaroi Vigand.

Ai vuri theksin te rëndësia e punës së gjykatës për viktimat. "Puna e tyre është e rëndësishme për të siguruar llogaridhënie dhe drejtësi për viktimat dhe familjet e tyre nga të gjitha komunitetet e Kosovës", tha zëdhënësi.

Pjesa më e drejtpërdrejtë e përgjigjes së tij iu kushtua mjeteve juridike që u mbeten atyre që janë dënuar. "Siç e kam theksuar edhe më parë, personat e dënuar me aktgjykimin e shkallës së parë, natyrisht, kanë të drejtë ta apelojnë aktgjykimin para gjyqtarëve të pavarur të apelit, në një panel të veçantë të Apelit të Dhomave të Specializuara", tha Vigand, duke theksuar edhe parimin e përgjegjësisë penale individuale.

Përfundimi i tij ishte i shkurtër: "Mbështetja jonë për Dhomat është e qëndrueshme dhe do të mbetet e tillë".

Nisma e PDK-së për ndryshimin e ligjit për Dhomat e Specializuara mbetet çështje e hapur në Prishtinë. Paralelisht, Gjykata Kushtetuese ka bashkuar lëndët e dorëzuara nga PDK-ja, çka do të thotë se shqyrtimi kushtetues nuk varet automatikisht nga vullneti i palës nismëtare: edhe një tërheqje eventuale e kërkesave nuk e ndal domosdoshmërisht procesin.