BDI-ja i vë presion Mickoskit: "Le të shpërndahet Kuvendi, le të shkojmë në zgjedhje"

Bashkimi Demokratik për Integrim (BDI), partia që drejtohet nga Ali Ahmeti, ka dalë hapur në kërkesë për zgjedhje të reja parlamentare në Maqedoninë e Veriut, duke kapur fjalët e kryeministrit Hristijan Mickoski dhe duke kërkuar që ato të kthehen menjëherë në veprim.

BDI-ja ka përshëndetur gatishmërinë e shprehur nga Mickoski për të shkuar në zgjedhje të parakohshme, nëse një gjë të tillë e kërkon opozita. Për BDI-në, që sot renditet në opozitë, ky kusht tashmë është plotësuar.

Partia argumenton se qeveria aktuale nuk ka më bazën për të vazhduar. "Qeveria e humbi legjitimitetin për të vazhduar me izolimin evropian, degradimin e marrëdhënieve ndëretnike, cenimin e Marrëveshjes së Ohrit dhe dobësimin e përfaqësimit të shqiptarëve në institucione", thuhet në reagimin e BDI-së.

Sipas partisë, deklarata e kryeministrit nuk mjafton pa hapa konkretë. BDI-ja kërkon përcaktimin e afatit më të shpejtë kushtetues për zgjedhjet dhe nisjen e menjëhershme të përgatitjeve zgjedhore, përfshirë shpërndarjen e Kuvendit dhe caktimin e datës.

Reagimi mbyllet me një thirrje të drejtpërdrejtë: "BDI është e gatshme. Le të shpërndahet Kuvendi. Le të caktohet data. Le të shkojmë në zgjedhje."