Bariu që kërcënoi turistët në bjeshkët e Junikut u arrestua dhe u lirua brenda ditës

Kërcënimi me prerje fyti ndaj disa turistëve në Bjeshkët e Nemuna e ka nxjerrë të dyshuarin para policisë, por vetëm përkohësisht: pas intervistimit, ai u lirua.

Ngjarja ndodhi dy ditë më parë, kur një bari dëgjohet duke kërcënuar një grup turistësh me prerje fyti dhe duke i urdhëruar që të kthehen nga rruga. Pamjet u publikuan në një portal dhe pikërisht ato e vunë në dijeni policinë.

Zëdhënësi i policisë për rajonin e Pejës, Driton Rugova, bëri të ditur se personi i dyshuar është identifikuar dhe arrestuar, ndërsa më pas është liruar me urdhër të prokurorit të shtetit.

"Me datën 20.09.2026, Policia është njoftuar nga një video incizim i cili është publikuar në një portal, se në bjeshkët e Junikut një person tani i dyshuar ka kanosur disa turistë, Policia ka identifikuar dhe arrestuar të dyshuarin, i njëjti është intervistuar në prezencën e avokatit mbrojtës dhe me urdhër të prokurorit të Shtetit i dyshuari është liruar në procedurë të rregullt, ndërsa rasti cilësohet 'kanosje'", ka thënë Rugova.

Policia nuk ka bërë publik identitetin e të dyshuarit, të cilit, sipas procedurës, i mbetet statusi i personit nën dyshim deri në një vendim të gjykatës. Nuk është saktësuar as numri i turistëve që u kërcënuan.

Rasti u shfaq publikisht pasi kryetari i Junikut kërkoi hetim për kërcënimet ndaj alpinistëve në rrugën drejt Gjeravicës, një nga itineraret më të frekventuara malore në Kosovë.