Avokati Koci: Nuk jam i mirëseardhur në Serbi, kosovarët e arrestuar nuk duhet të lihen pa avokat

Deri tani i ka mbrojtur pa pagesë dhe me shpenzimet e vet. Tani avokati Arianit Koci thotë se rruga drejt Serbisë është bërë rrezik për të, dhe se pa një marrëveshje me institucionet e Kosovës, qytetarët e arrestuar në Serbi mund të mbeten pa mbrojtje profesionale.

Koci ka publikuar një letër dërguar kryeministrit Albin Kurti, ushtrueses së detyrës së presidentes Albulena Haxhiu dhe ministrit të Punëve të Brendshme Xhelal Sveçla, në të cilën u bën thirrje institucioneve që qytetarët e arrestuar në Serbi të mos mbeten pa ndihmë profesionale.

Avokati kujton se në raste të tilla është angazhuar vazhdimisht, pa asnjë kompensim. "Pa pagesë. Edhe shpenzimet i kam mbuluar vetë", shkruan ai.

Sipas Kocit, kohëve të fundit autoritetet serbe e kanë ndaluar disa herë për "verifikime shtesë", duke e bërë atë ta konsiderojë veten të ekspozuar ndaj rrezikut në çdo udhëtim të mëtejshëm.

"Mesazhi është i qartë: nuk jam i mirëseardhur në Serbi. Çdo shkuarje atje më ekspozon ndaj rrezikut dhe ma kufizon mundësinë me u dalë në krah qytetarëve tanë", ka shkruar ai.

Pikërisht për këtë arsye, thotë Koci, i ka propozuar zyrtarisht qeverisë një bashkëpunim. "Prandaj, më 19 gusht i jam drejtuar Kryeministrit, me kopje Presidentes dhe Ministrit të Punëve të Jashtme, me një propozim konkret: që këtë angazhim ta vazhdoj në koordinim me institucionet tona", shkruan avokati, duke shtuar: "Përgjigje ende nuk kam marrë. Sot po e bëj publike shkresën".

Në letrën e publikuar mbetet e pasqaruar një mospërputhje: ndërsa letra i adresohet Kurtit, Haxhiut dhe ministrit të Punëve të Brendshme Xhelal Sveçla, Koci në citimin e vet thotë se kopjen e shkresës së 19 gushtit e ka dërguar Presidentes dhe ministrit të Punëve të Jashtme.

Nga zyrat e Kurtit, Haxhiut dhe Sveçlës nuk ka reagim publik ndaj thirrjes së avokatit. Numri dhe identiteti i qytetarëve të Kosovës që aktualisht mbahen të arrestuar në Serbi nuk janë bërë të ditur.