Avokati i Thaçit: Aktgjykimi ishte i paravendosur, drejtësia u tradhtua në Hagë

"Drejtësia u tradhtua në këtë proces." Kështu e ka përmbledhur Pierre Richard Prosper, avokat i ekipit mbrojtës të ish-presidentit të Kosovës, Hashim Thaçi, vendimin e Gjykatës Speciale ndaj ish-krerëve të UÇK-së, në një dalje publike mbrëmë.

I pyetur në emisionin "Rubikon" për mbështetjen financiare që Qeveria e Kosovës ka dhënë për mbrojtjen e ish-krerëve të UÇK-së në Hagë, Prosper u shmangu debatit për paratë, por vlerësoi se Qeveria ka qenë mbështetëse dhe se rezultati nuk varej nga ajo.

"Nuk do të futem në mbështetje financiare, mendoj se Qeveria ka qenë mbështetëse dhe për të qenë i sinqertë nuk jam i sigurt çfarë tjetër do të mund të bënte tjetër për të ndryshuar këtë rezultat. E thashë se është diçka që ka qenë e paravendosur. Ne kemi organizuar një nga mbrojtjet më të mira në historikun e tribunaleve. Kur kemi një komandant të forcave aleate ku ka gjithë preparatin prapa vetes e të jep këto informata, e diplomatë të lartë nga bota çka tjetër mundet një Qeveri siç është ajo e Kosovës të bëjë", deklaroi ai.

Ankesa më e drejtpërdrejtë e mbrojtjes ka të bëjë me konfidencialitetin. Sipas Prosperit, gjatë të gjithë procedurës çështjet e lidhura me këtë rast u mbajtën të fshehta nga publiku dhe mbrojtjes nuk i ishte lejuar të fliste për to.

"Gjatë gjithë procedurës çështjet që kishin të bënin me këtë ngjarje janë mbajtur konfidenciale, sekrete nga publiku. Dhe mund ta them, në këtë proces ne kishim shumë informata të mira, pyetje kryqëzore lidhur me këtë çështje që kishin të bënin me mbrojtjen dhe nuk na është lejuar të diskutonim", thotë avokati.

Ai theksoi se nuk kishte pasur as urdhër dhe as vendim të tribunalit që do t'i bënte publike këto ngjarje apo rrethanat, derisa sipas tij kjo ndryshoi vetëm në momentin e shpalljes së aktgjykimit: "Por në ditën kur publikohet aktgjykimi, gjykata vendos se është e rëndësishme që të shpallet kjo informatë, të bëhet publike pa informatat e tjera bazë për njerëzit."

Për mbrojtjen, kjo është pjesë e një problemi më të gjerë. "Prapë kjo është diçka tjetër problematike dhe i kthehet pikës sime lidhur me motivimin, i kthehet pikës se ky aktgjykim është përfaqësimi i pandershëm i sundimit të ligjit dhe drejtësisë", deklaroi Prosper.

Ai foli edhe për mundësinë e aktakuzave të reja nga Specialja, pasi në shpalljen e vendimit final u përmendën edhe disa emra, personalitete të UÇK-së.

Gjykata Speciale në Hagë më 16 shtator dënoi ish-krerët e UÇK-së me gjithsej 81 vjet burgim. Është vendim i shkallës së parë, dhe pas tij deklarimet publike janë përqendruar te hapat në vijim, përfshirë fazën e apelit.

Në Prishtinë, presioni politik ka marrë formën e thirrjeve për unitet. Ushtruesja e detyrës së presidentes, Albulena Haxhiu, u ka bërë thirrje institucioneve dhe partive politike që t'i lënë mënjanë përçarjet dhe akuzat e ndërsjella. Në një intervistë për RTK-në, ajo tha se tashmë kanë filluar diskutimet për veprimet e mëtejshme.