Avokati i Popullit: Padrejtësia ka ndodhur, drejtësia mund të rivendoset vetëm në apel

"Unë mendoj që padrejtësia tashmë ka ndodhur. E vetmja mundësi për ta rivendosur drejtësinë është marrja e një vendimi të drejtë", ka deklaruar Avokati i Popullit i Kosovës, Naim Qelaj, duke komentuar aktgjykimin e Hagës ndaj ish-krerëve të UÇK-së.

Në një intervistë për Klan Kosova, Qelaj ka thënë se pas aktgjykimit rruga e vetme për rivendosjen e drejtësisë është shqyrtimi i çështjes në shkallën e dytë, ndërsa institucionet e Kosovës, sipas tij, duhet të jenë më të vëmendshme dhe të kërkojnë përgjegjësi për veprimet dhe vendimet e Gjykatës Speciale.

Ombudspersoni ka theksuar se një gjykim i drejtë nuk mund të reduktohet në një përfundim formal juridik, por duhet të jetë rezultat i një procesi të pavarur dhe të paanshëm, që krijon besim te publiku. "Besimi i publikut është thelbësor. Nga reagimet publike mund të konstatoj pa dyshim që Gjykata ka dështuar në krijimin e këtij besimi në raport me qytetarët e Kosovës", ka thënë ai.

Për Qelajn, mungesa e këtij besimi cenon të dyja anët e procesit. "Përderisa publiku nuk është i bindur se verdikti është i drejtë, drejtësia nuk ka triumfuar as për viktimat dhe as për të akuzuarit", u shpreh Avokati i Popullit.

Ai ka kërkuar që mbrojtja të punojë fuqishëm në procedurën e apelit, ndërsa ekipet profesionale mbështetëse të ofrojnë argumente konkrete për një përfundim të drejtë. Qelaj ka paralajmëruar se, nëse dikush shpallet fajtor duke qenë i pafajshëm, pasojat do të ishin të rënda jo vetëm për të akuzuarit, por edhe për sistemin juridik e gjyqësor të Kosovës.

Aktgjykimi i Gjykatës Speciale në Hagë ka nxitur një valë reagimesh institucionale e politike në Kosovë dhe jashtë saj. Kuvendi i Shqipërisë ka dalë me një deklaratë të përbashkët në të cilën thuhet se agresori nuk mund të barazohet me viktimën, ndërsa BDI në Maqedoninë e Veriut ka reaguar me qëndrimin se drejtësia nuk mbrohet me standarde të dyfishta. Nga Haga, Hashim Thaçi ka falënderuar qytetarët dhe ka bërë thirrje për qetësi.