Avion ushtarak rrëzohet pranë bazës amerikane në Spangdahlem, një i lënduar

Zjarrfikësit dhe ekipet e urgjencës u nisën me shpejtësi drejt një terreni të thyer në regjionin e largët të Eifelit, pasi një avion ushtarak u rrëzua të martën pranë bazës ajrore amerikane të Spangdahlemit, në landin gjerman Rheinland-Palatinat.

Autoritetet lokale njoftuan fillimisht se një person ishte lënduar. Avioni, sipas raportimeve, ishte i Forcave Ajrore Amerikane.

Distrikti i Eifelit Bitburg-Prüm konfirmoi ndërhyrjen në faqen e tij të internetit: "Pas rrëzimit të një avioni në afërsi të bazës ajrore amerikane Spangdahlem, ekipet e zjarrfikësve dhe të reagimit emergjent nga Distrikti i Eifelit Bitburg-Prüm u dërguan në vendin e ngjarjes". Në të njëjtin njoftim, distrikti shtoi: "Për detajet e mëtejshme të ngjarjes nuk mund të bëhen komente nga ana e distriktit të Eifelit në këtë moment".

Autoritetet lokale thanë se reaguesit e parë po ndihmonin në vendin e ngjarjes, por që mund të komentonin vetëm në masë të kufizuar. Agjencia gjermane e lajmeve DPA raportoi shpejt pas shpërthimit të lajmit se Forcat Ajrore Amerikane nuk kishin reaguar menjëherë ndaj një kërkese për komentim. Shkaku i rrëzimit dhe tipi i avionit nuk janë bërë të ditur.

Spangdahlemi është një bazë amerikane në pjesën në veri të Trierit, në Rheinland-Palatinat, jo shumë larg në perëndim të kufirit me Luksemburgun. Objekti i NATO-s është ndërtuar në fillim të viteve 1950 dhe në të është vendosur Krahu i 52-të i Gjuetarëve i Forcave Ajrore Amerikane.