Autobot uji dhe gaz lotsjellës në Hagë: dy të arrestuar, një polic i lënduar

Dy protestues u arrestuan dhe një polic mbeti i lënduar gjatë përballjes në kryqëzimin e Zuid-Hollandlaan me Koningskade në Hagë, ka konfirmuar policia holandeze. Të dy personat u ndaluan për sjellje të pahijshme dhe prishje të rendit publik.

Sipas policisë holandeze, gjithçka nisi pasi kishte përfunduar tubimi i simpatizantëve të ish-krerëve të Ushtrisë Çlirimtare të Kosovës, të cilët u dënuan të njëjtën ditë nga Dhomat e Specializuara. "Të mërkurën, më 16 shtator, për një kohë të shkurtër pati tensione pas përfundimit të një proteste në Malieveld të Hagës. Në kryqëzimin e Zuid-Hollandlaan me Koningskade, një grup protestuesish u përball me policinë. Si pasojë, një polic u lëndua. Dy persona u arrestuan. Rreth orës 12:00, pas përfundimit të një proteste të simpatizantëve të Ushtrisë Çlirimtare të Kosovës, pati për pak kohë tensione", thuhet në deklaratën e policisë.

Protesta ishte paralajmëruar pranë Komunës së Hagës dhe si vend i saj ishte caktuar sheshi Malieveld. Por pas mbylljes së tubimit, një pjesë e protestuesve u nis, në kundërshtim me marrëveshjet paraprake, drejt Raamweg, rrugës ku ndodhen Dhomat e Specializuara të Kosovës.

"Për këtë nuk ishte dhënë leje. Ky ishte një nga skenarët që ishte parashikuar paraprakisht. Për të bllokuar kalimin drejt Raamweg, njësia policore e ndërhyrjes së shpejtë (Mobiele Eenheid) formoi një kordon. Kur një pjesë e protestuesve u përball me policinë, njësia ndërhyri dhe përdori forcën për t'i shpërndarë protestuesit", njoftoi policia.

Për një kohë të shkurtër, sipas së njëjtës deklaratë, u vunë në përdorim edhe autoboti me ujë dhe spreji lotsjellës. "Përmes ndërhyrjes së shpejtë dhe të vendosur, rendi u rivendos brenda një kohe të shkurtër", thekson policia holandeze.

Autoritetet holandeze thonë se dhuna erdhi edhe nga ana e tubuesve: "Gjatë përballjes me një grup protestuesish dhe bllokimit të Raamweg, një pjesë e protestuesve përdori dhunë ndaj policëve dhe mjeteve policore." Në pamjet e publikuara më herët nga protesta në Hagë ishin parë dy protestues të hipur mbi një automjet të policisë holandeze.

Identiteti i dy personave të arrestuar nuk është bërë publik.