ReklamëHapësirë reklame
ReklamëHapësirë reklame
Reklamë
Të shtënat me pushkë gjahu në kolegjin Lakanal tani hetohen si tentativë vrasjeje në lidhje me një sipërmarrje terroriste. Analiza e pajisjeve të të miturit, sipas prokurorisë, tregon përkatësinë e mundshme në True Crime Community, një rrjet digjital që lartëson autorët e masakrave.
Sulmi i 14-vjeçarit në kolegjin Lakanal të Aubagne-s, në departamentin Bouches-du-Rhône të Francës, tani trajtohet si çështje terrorizmi. Prokuroria Kombëtare Antiterroriste (PNAT) njoftoi të martën, më 13 tetor, se e ka marrë hetimin në dorë, pasi prokuroria e Marsejës hoqi dorë nga çështja.
Hetimi është hapur për tentativa vrasjesh me paramendim në lidhje me një sipërmarrje terroriste, për bashkim kriminel terrorist me qëllim kryerjen e krimeve kundër personave, si dhe për shkelje të legjislacionit për armët, gjithashtu në lidhje me një sipërmarrje terroriste. Sipas PNAT-it, hetimet vazhdojnë në procedurë flagrance.
Kthesa vjen nga telefoni dhe pajisjet e tjera të të miturit. "Hetimet e para të kryera, veçanërisht analiza e pajisjeve digjitale të të miturit, nxjerrin në pah përkatësinë e mundshme në lëvizjen True Crime Community (TCC), si dhe përfshirjen e veprimit kriminal të ndodhur brenda shkollës së tij në këtë ideologji", deklaroi prokuroria antiterror.
Vetë prokuroria e përshkruan këtë lëvizje me fjalë të prera: "TCC është një ekosistem komunitetesh digjitale që lartëson autorët e masakrave masive dhe nxit, në disa forma, përdorimin e dhunës ekstreme."
Të hënën, rreth orës 9:25, i riu hapi zjarr me pushkë gjahu brenda ambienteve të kolegjit, të cilën e kishte fshehur në një këllëf kitare. U plagosën drejtori i shkollës dhe një mësuese, jeta e të cilëve nuk është në rrezik. Nxënësi u neutralizua nga këshilltari kryesor i edukimit në shkollë dhe më pas u arrestua.
Pak orë pas sulmit, babai dhe nëna e të miturit u ndaluan nga policia. Ministri francez i Brendshëm, Laurent Nuñez, i cili shkoi në vendngjarje, tha se ndalimi u bë "për të provuar të kuptojmë se si ky i ri është gjendur në posedim të kësaj arme". Si e siguroi i riu pushkën, ende nuk është bërë e ditur.
Prefekti, nga ana e tij, theksoi se nxënësi "nuk njihet për vepra delikuence, për radikalizim". Të martën kolegji mbeti i mbyllur për nxënësit.
Gurë kalldrëmi të shkulur nga Parku Rinia, gaz lotsjellës dhe mbi 100 të arrestuar: protestat kundër qeverisë në Shqipëri hynë në ditën e shtatë pa asnjë shenjë qetësimi. Kryeministri Rama i quan pjesë të një sulmi të koordinuar, ndërsa protestuesit fajësojnë policinë për dhunën.
