ATK u vë syrin bizneseve që mund të kenë kaluar pragun e 30 mijë eurove për TVSH

Bizneset që kanë deklaruar qarkullim afër ose mbi 30,000 euro në vit, por që ende nuk janë në sistemin e TVSH-së, kanë hyrë në vëmendjen e Administratës Tatimore të Kosovës (ATK).

Sipas ATK-së, analizat e të dhënave të saj kanë nxjerrë në pah një kategori tatimpaguesish për të cilët ka indikacione të arsyeshme se, bazuar në deklarimet për periudhat tatimore 2024 dhe 2025, mund ta kenë përmbushur kriterin ligjor për regjistrim në Tatimin mbi Vlerën e Shtuar. ATK nuk ka bërë të ditur sa tatimpagues përfshihen në këtë kategori.

Legjislacioni tatimor në fuqi është i qartë: personi i tatueshëm që ushtron aktivitet ekonomik në mënyrë të pavarur dhe që brenda një viti kalendarik tejkalon qarkullimin prej 30,000 eurosh, është i detyruar të regjistrohet për TVSH. Për këtë arsye, institucioni tatimor ka filluar monitorimin e këtyre bizneseve, me qëllim që të verifikojë saktësinë e deklarimeve dhe nëse janë përmbushur detyrimet për regjistrim.

ATK u ka tërhequr vërejtjen tatimpaguesve të rishikojnë deklarimet për periudhat përkatëse, sidomos të dhënat për qarkullimin e realizuar. Nëse gjejnë pasaktësi ose konstatojnë se i plotësojnë kriteret, ata duhet t'i korrigjojnë deklarimet dhe të regjistrohen në TVSH. Institucioni i fton ta bëjnë këtë vullnetarisht dhe me kohë, para se të nisin procedurat e verifikimit nga ana e tij, në mënyrë që të shmangin pasojat dhe masat ligjore që mund të aplikohen për mospërmbushje të detyrimeve.

Pas kësaj periudhe, sipas ATK-së, tatimpaguesit e kësaj kategorie do të jenë objekt i verifikimit dhe trajtimit tatimor, në përputhje me procedurat në fuqi.

Paralajmërimi vjen në një kohë kur sistemi i TVSH-së po zgjerohet: vetëm nga janari deri në gusht të vitit 2026 janë regjistruar 3,093 biznese të reja, duke e çuar numrin e përgjithshëm të bizneseve të regjistruara në TVSH në 40,082.