Arrestohet i dyshuari për nënën e shtyrë nga kati i 15-të me foshnjën në krahë në Bronks

Policia e Nju Jorkut (NYPD) arrestoi natën vonë të së mërkurës Angel Carrasco, 31 vjeç, të cilin e kishte identifikuar vetëm pak orë më parë si të dyshuarin kryesor për vdekjen e N. R., një nëne 23-vjeçare që u shty nga ballkoni i një apartamenti në katin e 15-të në Bronks.

Sipas zyrtarëve, Carrasco ishte fshehur në shtëpinë e një miku kur policët e gjetën. Ai përballet me akuza për vrasje, tentativë vrasjeje, vrasje pa dashje, tentativë vrasjeje pa dashje dhe sulm. Të gjitha akuzat mbeten për t'u provuar në gjykatë.

Ngjarja ndodhi herët të martën, në një ndërtesë banimi në Olinville Avenue, në lagjen Allerton. Sipas hetuesve, gruaja mbante në krahë vajzën e saj 8-muajshe kur u shty, dhe të dyja ranë në tokë. Nëna u shpall e vdekur në spital, ku u dërgua edhe foshnja. Autoritetet besojnë se trupi i nënës mund ta ketë zbutur rënien e vogëlushes.

Një fqinje tha se e kishte dëgjuar gruan e re duke iu lutur dikujt pak çaste para tragjedisë: "E dëgjova duke bërtitur dhe duke ulëritur: 'Të lutem, mos e bëj këtë. Foshnja ime. E di që foshnja ime është e frikësuar. Shikoja fytyrën.'" Dhe më pas: "Papritur, e dëgjoj të ulërasë dhe shoh diçka që përplaset në tokë." Një tjetër banore e ndërtesës Allerville Arms tregoi se kishte dëgjuar zëra të ngritur në mes të natës, përpara se britmat t'i çonin njerëzit te trupi i gruas jashtë.

Gjatë hetimit, policia shqyrtoi pamjet e kamerave të sigurisë. Sipas burimeve policore, në to shihet një burrë me bluzë me kapuç duke u larguar ndërsa policët po mbërrinin në vendngjarje. Po sipas burimeve, në adresën e viktimës kishte një histori dhune në familje, dhe pas ngjarjes policia kërkonte të merrte në pyetje ish-të dashurin e saj; nuk është bërë e ditur nëse i arrestuari është i njëjti person.

Te memoriali që po rritet para ndërtesës, një ish-shok klase i saj nga shkolla e mesme Bronx Leadership Academy e kujtoi si një njeri të mirë. "Ajo shkonte mirë me të gjithë. Fliste gjithmonë me të gjithë", tha ai, duke shtuar se, kur shihte dikë në ditë të keqe, ajo bënte shaka me të "për t'ia gjallëruar ditën".