Vlora Hyseni ndalohet në kufi, arrest shtëpiak nga SPAK për dosjen e AKSHI-t

Pika kufitare mes Kosovës dhe Shqipërisë u bë vendi ku u mbyll rrethi rreth Vlora Hysenit, figurës kryesore të shërbimit sekret shqiptar. Ajo u vu nën kontrollin e autoriteteve shqiptare pas vendimit të Gjykatës së Posaçme kundër Korrupsionit dhe Krimit të Organizuar, e cila, me kërkesë të SPAK, i caktoi masën "arrest në shtëpi".

Rrethanat e këtij momenti mbeten të pasqaruara. Sipas raportimit të Lajmi.net, Hyseni u arrestua në pikëkalimin kufitar në Vërmicë, ndërsa sipas raportimit të Top Channel, të përcjellë edhe nga mediat në Kosovë, ajo iu dorëzua vetë autoriteteve shqiptare në kufi me Kosovën. Po ashtu mbetet i pasqaruar edhe statusi i saj zyrtar: në një version ajo paraqitet si drejtoreshë aktuale e Shërbimit Informativ të Shtetit, e pezulluar nga detyra, e në një tjetër si ish-drejtoreshë e SHISH-it.

Masa ndaj saj është pjesë e hetimeve për dosjen e AKSHI-t. Në kuadër të së njëjtës procedurë janë zhvilluar kontrolle edhe në banesat e personave të tjerë të përfshirë në hetim, mes tyre ish-drejtori i Përgjithshëm i Policisë së Shtetit, Ilir Proda. Akuzat konkrete ndaj Hysenit nuk janë bërë publike dhe, derisa nuk ka vendim gjykate, ajo mbetet e dyshuar.

Emri i saj nuk është i panjohur as në Kosovë. Hyseni ka qenë në të kaluarën zëvendësdrejtoreshë e Agjencisë Kosovare të Inteligjencës, detyrë nga e cila u shkarkua më 30 qershor të vitit 2021, nga ish-presidentja e Kosovës, Vjosa Osmani, dhe kryeministri Albin Kurti.