Arabia Saudite hap dyert për kosovarët: vizë elektronike ose në mbërritje

Qytetarët e Kosovës mund të udhëtojnë tashmë drejt Arabisë Saudite me një vizë turistike që nuk kërkon më procedurat e zakonshme. Ata mund të aplikojnë për vizë elektronike ose ta marrin atë në mbërritje, në pikat e hyrjes në Mbretëri.

Vendimi u bë i ditur nga Ministria e Punëve të Jashtme e Arabisë Saudite, e cila njoftoi se Republika e Kosovës, së bashku me Republikën Kooperative të Guajanës, i është shtuar listës së vendeve qytetarët e të cilave përfitojnë nga procedurat e thjeshtësuara për marrjen e vizës turistike.

Viza nuk kufizohet vetëm te pushimet. Ajo u mundëson udhëtarëve të vizitojnë vendin për turizëm, për pjesëmarrje në ngjarje, ekspozita dhe konferenca. Sipas ministrisë saudite, mbajtësit e saj mund ta përdorin edhe për të kryer Umren, si dhe për të vizituar të afërmit dhe miqtë në Arabinë Saudite.

Zgjerimi i skemës është pjesë e përpjekjeve të Rijadit për ta hapur vendin ndaj më shumë vizitorëve ndërkombëtarë dhe për t'i thjeshtuar procedurat e hyrjes. Autoritetet saudite synojnë t'ua lehtësojnë turistëve pjesëmarrjen në kalendarin gjithnjë e më të pasur të ngjarjeve, si edhe vizitat në atraksionet turistike dhe kulturore.

Ky hap vjen në vazhdën e investimeve të ndjeshme që Arabia Saudite ka bërë vitet e fundit në sektorin e turizmit, si pjesë e një strategjie për diversifikimin e ekonomisë dhe uljen e varësisë nga nafta, me synimin për të tërhequr miliona vizitorë të huaj.