Arabia Saudite hap derën për kosovarët: vizë elektronike ose në mbërritje

Udhëtimi turistik drejt Arabisë Saudite po bëhet më i thjeshtë për qytetarët e Kosovës. Autoritetet saudite e kanë zhvendosur Kosovën nga Grupi B në Grupin A të shteteve që përfitojnë nga procedurat e lehtësuara të vizave, njoftoi Ministria e Punëve të Jashtme dhe Diasporës (MPJ).

Në praktikë, sipas MPJ-së, kosovarët tani mund të aplikojnë për vizë elektronike ose të pajisen me vizë drejtpërdrejt në mbërritje në Arabinë Saudite. Lehtësimi vlen vetëm për udhëtimet me qëllim turistik, ndërsa data e hyrjes në fuqi të vendimit nuk është bërë ende e ditur.

Ministria e ka cilësuar vendimin si zhvillim pozitiv, si për lehtësimin e udhëtimeve të qytetarëve, ashtu edhe për forcimin e bashkëpunimit dhe të marrëdhënieve ndërmjet Kosovës dhe Arabisë Saudite.