Anulonte blerjet, regjistronte qeset: arkëtarja kosovare dënohet me kusht dhe dëbim nga Zvicra

Një blerje anulohej, paratë përfundonin në xhep dhe në arkë regjistrohej vetëm një qese plastike me vlerë disa centë. Kjo është skema për të cilën një arkëtare kosovare 30-vjeçare u akuzua se kishte marrë gjithsej 38,000 franga zvicerane nga një dyqan fshati në ultësirën e Cyrihut, gjatë disa muajve.

Gjykata e Qarkut Dielsdorf e shpalli fajtore për vjedhje tregtare dhe falsifikim dhe i dha një dënim me kusht prej 14 muajsh. Përveç kësaj, gjykata urdhëroi dëbimin e saj nga Zvicra për pesë vjet.

Rasti doli në dritë pasi u zbuluan mbi një mijë fatura të dyshimta. Gruaja i mohoi akuzat, por gjykata e vlerësoi fajësinë e saj të pamohueshme në rastet që provoheshin nga regjistrimet video. Për manipulimet e tjera të dyshuara, provat nuk mjaftuan për të vërtetuar fajin përtej çdo dyshimi të arsyeshëm dhe për to ajo u lirua.

Ky dallim duket edhe te shuma që duhet të paguajë: jo 38,000 franga, sa ishte vlera e dyshuar fillimisht, por afërsisht 20,000 franga zvicerane, që gjykata urdhëroi t'i kthehen ish-punëdhënësit të saj.

Gjatë procesit, gruaja kishte deklaruar se një vendim i tillë do të rrezikonte martesën dhe planet e saj familjare. Vendimi nuk është i formës së prerë dhe ajo ka të drejtë ta apelojë.