Anija turke goditet në Detin e Zi, inxhinieri shqiptar mungon mes të shpëtuarve

Emri i tij nuk ishte në listën e të shpëtuarve. Inxhinieri i dytë i anijes tregtare turke "Aroyat", një burrë me origjinë shqiptare i identifikuar me inicialet E.N., rezulton i zhdukur pas sulmit ndaj mjetit detar në ujërat e Detit të Zi, pranë portit rus të Novorossiysk.

Anija, me 16 anëtarë ekuipazhi në bord, pësoi dëme të mëdha dhe u përfshi nga zjarri në pjesën e pasme. Goditja raportohet të jetë kryer me dron, ndonëse kjo mbetet ende në nivel dyshimi. Shumica e detarëve u evakuuan.

Për inxhinierin, fati vazhdon të jetë i pazbardhur. Familjarët e tij kanë dalë publikisht duke kërkuar ndihmë për ta gjetur. I vëllai ka ngritur dy hipoteza: ai mund të jetë dërguar në ndonjë spital në Rusi, ose mund të ketë mbetur i bllokuar në dhomën e motorëve.

Një përgjigje mund të vijë nga vetë anija. Ajo po rimorkiohet drejt Turqisë, ku pritet t'i nënshtrohet një kontrolli të imtësishëm në të gjitha ambientet e mbyllura. Përveç dëmeve materiale, autoritetet nuk kanë konfirmuar ende zyrtarisht nëse incidenti ka lënë viktima.