Ambasadori gjerman për Banjskën: Radoiçiqi duhet të dalë para gjykatës

Milan Radoiçiqi dhe të gjithë ata që janë përgjegjës për sulmin e armatosur në Banjskë duhet të japin llogari para drejtësisë. Ky është mesazhi i ambasadorit të Gjermanisë në Kosovë, Rainer Rudolph, i cili thotë se vendi i tij e ka përsëritur këtë qëndrim në disa raste.

"Ne kemi thënë shumë qartë në shumë raste se Milan Radoiçiqi dhe të gjithë ata që janë përgjegjës për sulmin në Banjskë duhet të mbahen përgjegjës para gjykatës", deklaroi Rudolph në një intervistë për KP.

Sulmi ndodhi më 24 shtator 2023 në Banjskë të Zveçanit. Sipas ambasadorit, Gjermania e ka bërë të qartë më shumë se një herë se personat e përfshirë në të duhet të mbajnë përgjegjësi.

Rudolph u ndal edhe te zgjedhjet në Serbi, ku shqiptarët po garojnë të bashkuar, si dhe te raportimet për presion dhe propagandë gjatë fushatës. Për këtë çështje, diplomati gjerman zgjodhi të mos hyjë në vlerësime, duke e kthyer vëmendjen te marrëdhëniet mes dy vendeve.

"Unë jam ambasador i Gjermanisë në Kosovë dhe nuk do të komentoj për procesin e brendshëm në Serbi. Por, ajo që mund të them është se shpresoj shumë që të krijohen kushtet për avancimin e dialogut ndërmjet Kosovës dhe Serbisë, për përmirësimin e marrëdhënieve ndërmjet dy vendeve dhe, në fund, për arritjen e normalizimit të plotë të marrëdhënieve", tha ai.