Alarmi shpëtoi shtëpinë e Joan Garcias: dy të arrestuar për vjedhjet te yjet e Barcelonës

Një alarm që ra në kohën e duhur e shpëtoi shtëpinë e portierit të Barcelonës, Joan Garcia, nga vjedhja. Tani dy persona janë në paraburgim. Policia katalunase ka arrestuar dy të dyshuar, njërin 58 vjeç dhe tjetrin 42 vjeç, për përfshirje në një seri vjedhjesh në shtëpi luksoze në Kataluni.

Tentativa ndodhi më 10 janar, në zonën e Baix Llobregat, ku Garcia jeton me partneren e tij. Atë ditë portieri ndodhej në Arabinë Saudite me skuadrën për Superkupën e Spanjës. Dyshohet se të arrestuarit përfituan pikërisht nga kjo mungesë për të hyrë në banesë. Sistemi i alarmit u aktivizua, policia ndërhyri dhe vjedhja nuk u krye.

Sipas gazetës spanjolle Mundo Deportivo, dy të arrestuarit dyshohet se bëjnë pjesë në një grup kriminal që ka goditur disa prona në Kataluni. Hetimet kanë nxjerrë në pah se grupi kishte vëzhguar edhe shtëpinë e mbrojtësit francez të Barcelonës, Jules Kounde, duke përgatitur një vjedhje që në fund nuk u realizua. Njëri prej të dyshuarve, me inicialet A.B., është i njohur për policinë për vepra të përsëritura dhe dyshohet se ka pasur rol drejtues në organizimin e këtyre operacioneve.

Të dy të arrestuarit janë dërguar në paraburgim, ndërsa një grua tjetër e përfshirë në hetim është liruar pasi u paraqit para gjykatës. Hetimet vazhdojnë: autoritetet po shqyrtojnë nëse grupi ka lidhje edhe me vjedhje të tjera në shtëpi luksoze në Kataluni.