ReklamëHapësirë reklame
ReklamëHapësirë reklame
Reklamë
Shefi i shërbimit çek të sigurisë paralajmëron mundësinë e një inkursioni të kufizuar në territorin e NATO-s brenda muajsh, ndërsa shërbimet baltike kërkojnë qetësi: nuk ka shenja të një sulmi të afërt.
Një skenar që deri vonë përmendej si hipotezë e largët tani diskutohet me afat kohor: një provokim ose një inkursion i kufizuar rus në territorin e NATO-s, i mundshëm, sipas drejtuesit të shërbimit çek të sigurisë BIS, Michal Koudelka, brenda muajve dhe jo viteve. Koudelka, në një intervistë të rrallë në selinë e agjencisë në Pragë, tha se përveç rritjes së aktivitetit me dronë, në planet e Kremlinit mund të përfshihet edhe një invazion i shkallës së vogël në një territor të NATO-s që kufizohet me Rusinë.
Paralajmërimi erdhi pasi kryeministri polak, Donald Tusk, u tha deputetëve se vlerësimet e inteligjencës sugjerojnë që Rusia mund të nisë në muajt në vijim një sulm me dronë ose raketa mbi territorin e Aleancës, si pjesë e përpjekjeve për të treguar se neni 5 është më shumë teorik sesa praktik. Presidenti francez, Emmanuel Macron, i cilësoi paralajmërimet e Tuskut të bazuara dhe të dokumentuara mirë. Të premten Macron mblodhi në Paris liderët e partive dhe kandidatët për zgjedhjet presidenciale të vitit 2027 në një takim urgjent, ku u diskutua, ndër të tjera, edhe informacioni i inteligjencës për një kërcënim në rritje nga Rusia.
Në kahun tjetër qëndrojnë tri vendet baltike, që kufizohen drejtpërdrejt me territorin rus. Zyrtarët e tyre janë treguar më të kujdesshëm ndaj perspektivës së një invazioni apo një përshkallëzimi serioz, duke iu referuar burimeve të tejzgjatura të Moskës në Ukrainë dhe duke paralajmëruar se fryrja e skenarit të një sulmi masiv mund t'i shkojë për shtat vetë Kremlinit. Drejtori i përgjithshëm i VDD-së, shërbimit shtetëror të sigurisë së Letonisë, Normunds Mežviets, deklaroi në selinë e agjencisë në Riga se nuk shihen indikacione për një sulm të afërt.
Mežviets pranoi se ka shenja që Moska po përgatit veprime më vendimtare në Evropë, por nënvizoi se mbetet e paqartë nëse bëhet fjalë për plane konkrete apo thjesht për një strategji destabilizimi që synon përhapjen e frikës dhe të pasigurisë në shoqërinë perëndimore. Politikanët baltikë tashmë gjenden në pozitën e pazakontë të atyre që u kërkojnë disa liderëve perëndimorë të ulin tonin publik, nga frika se të folurit për një invazion të afërt mund të dëmtojë shoqëritë dhe ekonomitë e tyre. Të shtunën, sekretari i përgjithshëm i Ministrisë së Jashtme të Estonisë, Jonatan Vseviov, kritikoi në rrjetin X panikun në mediat sociale të ditëve të fundit për një sulm të mundshëm. Megjithatë, Mežviets vlerësoi se, në tërësi, është gjë e mirë që Evropa Perëndimore është zgjuar përballë kërcënimit rus.
As Mežviets, as Koudelka nuk pranuan të flasin për informacionet konkrete që mund të jenë siguruar rreth planifikimit të supozuar rus për muajt në vijim. Të dy shmangën gjithashtu komentin nëse udhëtimi i papritur i drejtorit të CIA-s, John Ratcliffe, në Moskë muajin e kaluar, gjatë të cilit ai ndaloi edhe në Riga, kishte si qëllim të paralajmëronte Kremlinin për rreziqet e një sulmi ndaj NATO-s. Pas asaj vizite, zëdhënësi i Kremlinit, Dmitry Peskov, i hodhi poshtë thashethemet për një sulm rus ndaj Aleancës. Një dinamikë e ngjashme u pa përpara pushtimit të plotë të Ukrainës në vitin 2022, kur zyrtarët amerikanë paralajmëruan vazhdimisht se Rusia po përgatitej të sulmonte, ndërsa Kremlini e mohonte njëlloj vazhdimisht.
Këto vlerësime vijnë në një moment kur përpjekjet e udhëhequra nga SHBA-ja për paqe në Ukrainë nuk japin asnjë shenjë suksesi dhe të dyja palët po intensifikojnë goditjet me dronë e raketa. Në orët e para të së dielës, Kievi goditi Moskën dhe rajone të tjera ruse me qindra dronë dhe raketa, në një nga sulmet më të mëdha ajrore të luftës. Ukraina ka shkatërruar një pjesë të madhe të infrastrukturës ruse të naftës, duke synuar rafineri dhe objekte të tjera gjatë muajve të fundit.
Moska ka deklaruar shpesh se furnizimi i Ukrainës me armatim, informacione inteligjence dhe këshilltarë ushtarakë i kthen vendet perëndimore në pjesëmarrëse të luftës dhe në objektiva legjitime, por deri tani ka shmangur veprime që mund të provokonin një përgjigje të koordinuar të NATO-s. Agjencitë perëndimore përshkruajnë një fushatë ruse sabotazhi kundër objektivave në vendet që mbështesin më zëshëm Ukrainën, si dhe incidente të veçuara që duket se synojnë të testojnë kufijtë, siç ishte rasti një vit më parë kur më shumë se një duzinë dronësh, që fluturonin pa municion, devijuan në hapësirën ajrore polake.
Koudelka e përmblodhi taktikën aktuale ruse si përshkallëzim për të shpërshkallëzuar: Kremlini kërkon të godasë pikat e dobëta të shoqërive perëndimore për të ulur mbështetjen ndaj përpjekjes luftarake të Ukrainës. Debati mes Pragës dhe kryeqyteteve baltike zhvillohet ndërsa Asambleja e Përgjithshme e OKB-së mblidhet këtë javë në Nju Jork.
Ministria e Mbrojtjes e Serbisë promovoi një dokumentar që lartëson korpusin e Prishtinës, njësinë dy komandantët e së cilës u dënuan në Hagë për krime lufte. Në premierën në Nish ishte i pranishëm edhe njëri prej tyre, Vlladimir Llazareviqi.
