Aktgjykimi i plotë: 25 vjet për Thaçin dhe Krasniqin, pafajësi për krime kundër njerëzimit

Njëzet e pesë vjet burgim për Hashim Thaçin dhe Jakup Krasniqin, tetëmbëdhjetë për Kadri Veselin dhe trembëdhjetë për Rexhep Selimin. Këto janë dënimet e shqiptuara nga trupi gjykues i Dhomave të Specializuara të Kosovës në Hagë, i cili shpalli sot aktgjykimin e shkallës së parë ndaj katër ish-krerëve të Ushtrisë Çlirimtare të Kosovës.

Në pjesën e parë të vendimit, trupi gjykues i shpalli të katërt të akuzuarit të pafajshëm për akuzat për krime kundër njerëzimit. Gjykata konstatoi se Zyra e Prokurorit të Specializuar nuk kishte arritur të vërtetonte, përtej dyshimit të arsyeshëm, se ishte kryer një sulm i përhapur ose sistematik kundër një popullate civile, element i domosdoshëm për vërtetimin e këtyre akuzave. Të katërtit u shpallën të pafajshëm edhe në lidhje me një numër incidentesh të përfshira në akuzat për krime lufte.

Megjithatë, trupi gjykues konstatoi se Thaçi, Veseli, Selimi dhe Krasniqi janë penalisht përgjegjës për krimet e luftës të ndalimit arbitrar, trajtimit mizor, torturës dhe vrasjes së paligjshme. Sipas aktgjykimit, kjo përgjegjësi penale përfshin ndalimin arbitrar të 385 personave, trajtimin mizor të 49 personave dhe torturën ndaj 303 personave. Gjykata konstatoi gjithashtu përgjegjësi për vrasjen e paligjshme të 96 personave.

Në dënimet e shqiptuara do të llogaritet edhe koha që të katër të akuzuarit kanë kaluar në paraburgim në Hagë, ku ndodhen që nga nëntori i vitit 2020. Aktgjykimi vjen pas një procesi gjyqësor shumëvjeçar.

Reagimet pas shpalljes së vendimit ishin të menjëhershme. Nga mbrojtja e Rexhep Selimit u tha: "Jemi shumë të zhgënjyer me aktgjykimin". Vetë Jakup Krasniqi, pas dënimit, e cilësoi vendimin me fjalët: "Poshtërsi - jo në emrin tim, as në emër të popullit". Vlora Çitaku reagoi me mesazhin "Rezistencë deri në liri", ndërsa Sali Berisha e quajti ditën "Ditë e rëndë për shqiptarët, vendimi i Hagës s'mund ta errësojë luftën e UÇK-së", duke shtuar: "Festë në Serbi! U shqyrtuan dosjet e Beogradit".

Ndërkohë, jashtë objektit të gjykatës në Hagë u raportuan arrestime gjatë protestës së shqiptarëve, ku policia holandeze përdori edhe qentë kundër protestuesve.